విద్యుత్తు ద్విచక్ర వాహన ధరలు పెరిగాయ్‌

హీరో ఎలక్ట్రిక్‌ యథాతథం

దిల్లీ: టీవీఎస్‌ మోటార్‌ , ఏథర్‌ ఎనర్జీ, ఓలా ఎలక్ట్రిక్‌ తమ విద్యుత్తు స్కూటర్ల ధరలను పెంచాయి. జూన్‌ 1 నుంచి ఫేమ్‌-2 పథకం కింద ప్రభుత్వం సబ్సిడీని తగ్గించిన నేపథ్యంలో తమ ఐక్యూబ్‌ స్కూటర్‌ ధరలు వేరియంట్‌ను బట్టి రూ.17,000-22,000 వరకు పెరగనున్నట్లు టీవీఎస్‌ మోటార్‌ తెలిపింది. ఐక్యూబ్‌, ఐక్యూబ్‌ ఎస్‌ ధరలు వరుసగా అంతక్రితం రూ.1,06,384; రూ.1,16,886(దిల్లీ ఎక్స్‌షోరూం)గా ఉన్నాయి.

* 450ఎక్స్‌ (ప్రొ ప్యాక్‌) ధరలు ఇకపై రూ.1,65,435 నుంచి మొదలవుతాయని ఏథర్‌ ఎనర్జీ తెలిపింది. రూ.8,000 వరకు వీటి ధర పెరిగింది.  

* ఓలా ఎస్‌1 ప్రొ రూ.1,39,999; ఎస్‌1(3కేడబ్ల్యూహెచ్‌) రూ.1,29,999; ఎస్‌1 ఎయిర్‌(3కేడబ్ల్యూహెచ్‌) ధర రూ.1,09,999గా నిర్ణయించింది. ఇప్పటివరకు అమలైన ధరలతో పోలిస్తే ఇవి రూ.15,000 వరకు అధికం.

* హీరో ఎలక్ట్రిక్‌ మాత్రం తమ ఇ-స్కూటర్‌ మోడళ్ల ధరలను పెంచడం లేదని ప్రకటించింది.

ఎందుకు పెంచాయంటే: విద్యుత్‌ స్కూటర్లకు ఒక్కో కిలోవాట్‌ అవర్‌ (కేడబ్ల్యూహెచ్‌)కు రూ.15,000 సబ్సిడీ ఉండేది. ఈ సబ్సిడీని రూ.10,000కు పరిమితం చేశారు. ఎక్స్‌ ఫ్యాక్టరీ ధరపై ప్రోత్సాహకాలు ఇప్పటివరకు 40 శాతంగా ఉండగా.. ఇకపై అవి 15 శాతం వరకే ఉంటాయి.