TATA Group: అత్యంత విలువైన బ్రాండ్‌ టాటా గ్రూప్‌

తర్వాతి స్థానాల్లో ఇన్ఫోసిస్‌, ఎల్‌ఐసీ
బ్రాండ్‌ ఫైనాన్స్‌ గ్లోబల్‌ 500 జాబితా

భారత్‌లో అత్యంత విలువైన బ్రాండ్‌గా టాటా గ్రూప్‌ తన స్థానాన్ని నిలబెట్టుకున్నట్లు బ్రాండ్‌ ఫైనాన్స్‌ తాజా నివేదికలో పేర్కొంది. ఈ గ్రూప్‌ బ్రాండ్‌ విలువ 2022తో పోలిస్తే 10.3% వృద్ధి చెంది 26.38 బిలియన్‌ డాలర్ల (దాదాపు రూ.2.16 లక్షల కోట్ల)కు చేరింది. 25 బిలియన్‌ డాలర్లకు పైగా విలువ కలిగిన ఏకైక భారతీయ బ్రాండ్‌గానూ టాటా గ్రూప్‌ అవతరించింది. బ్రాండ్‌ ఫైనాన్స్‌ 500 సంస్థలతో రూపొందించిన ఈ జాబితా ప్రకారం..

* అగ్రగామి 100 కంపెనీల్లో చోటు దక్కించుకున్న ఏకైక భారతీయ బ్రాండ్‌ టాటా గ్రూప్‌ మాత్రమే.

* 13 బిలియన్‌ డాలర్లతో భారత బ్రాండ్లలో ఇన్ఫోసిస్‌ రెండో స్థానంలో కొనసాగుతోంది. ఎయిర్‌టెల్‌ 4వ స్థానంలో ఉండగా.. 11వ స్థానంలో జియో గ్రూప్‌ నిలిచింది.

*బ్యాంకుల్లో ఎస్‌బీఐ అగ్రస్థానంలో ఉండగా.. తర్వాతి స్థానాల్లో హెచ్‌డీఎఫ్‌సీ బ్యాంక్‌, ఐసీఐసీఐ బ్యాంక్‌ ఉన్నాయి.

* మహీంద్రా గ్రూప్‌ 17% విలువ పెంచుకుని 7వ స్థానంలోకి వచ్చింది. ఇదే గ్రూప్‌నకు చెందిన మహీంద్రా అండ్‌ మహీంద్రా 53.8% వృద్ధితో 3.6 డాలర్లకు బ్రాండ్‌ విలువను పెంచుకుంది. భారత్‌లో అత్యంత వేగవంతమైన ఆటోమొబైల్‌ బ్రాండ్‌గా.. అంతర్జాతీయంగా అత్యంత వేగవంతమైన టాప్‌-10 ఆటోమొబైల్‌ బ్రాండ్‌గా నిలిచింది. మహీంద్రాతో పాటు టాటా మోటార్స్‌, మారుతీ కూడా విలువ విషయంలో రెండంకెల వృద్ధిని సాధించాయి.

* మార్కెటింగ్‌ పెట్టుబడి, విశ్వసనీయత, సిబ్బంది సంతృప్తి తదితర అంశాల్లో ‘తాజ్‌’ భారత్‌లోనే అత్యంత బలమైన బ్రాండ్‌గా ఉంది.

* లోహ కంపెనీల్లో టాటా స్టీల్‌, హిందాల్కో, వేదాంతా మెరుగైన వృద్ధిని కనబరచాయి.

* రేమండ్‌ అత్యంత విలువైన దుస్తుల బ్రాండ్‌గా నిలిచింది. దీని విలువ 83.2% వృద్ధితో 273 మి. డాలర్లకు చేరుకుంది. భారత్‌లో టాప్‌-100లో స్థానం దక్కించుకుంది.

* ఇండిగో అత్యంత విలువైన(832 మి. డాలర్లు) విమానయాన బ్రాండ్‌గా నిలిచింది. ఎయిరిండియా సైతం 18% వృద్ధితో 365 మి. డాలర్లకు పెంచుకుంది.