మారుతీ జిమ్నీ వచ్చేసింది

ప్రారంభ ధర రూ.12.74 లక్షలు

దిల్లీ: దేశంలో వేగంగా అభివృద్ధి చెందుతున్న స్పోర్ట్స్‌ వినియోగ వాహనాల (ఎస్‌యూవీ) విభాగంలో 25% మార్కెట్‌ వాటా పొందాలనే లక్ష్యంతో మారుతీ సుజుకీ అడుగులేస్తోంది. ఇందులో భాగంగానే ‘జిమ్నీ’ మోడల్‌ను దేశీయ విపణిలోకి విడుదల చేసింది. 1.5 లీటర్‌ పెట్రోల్‌ ఇంజిన్‌, ఐదు డోర్లు కలిగిన ఈ ఎస్‌యూవీ నెక్సా విక్రయ కేంద్రాల్లో లభించనుంది. 5- స్పీడ్‌ మాన్యువల్‌ మోడళ్లు రూ.12.74-13.85 లక్షల శ్రేణిలో, 4-స్పీడ్‌ ఆటోమేటిక్‌ మోడళ్లు రూ.13.94-15.05 లక్షల శ్రేణిలో లభిస్తాయని కంపెనీ పేర్కొంది. ‘ఐదు డోర్ల జిమ్నీ దేశీయంగా తయారవుతుండటం, ఇక్కడే తొలిసారి విపణిలోకి విడుదల చేస్తుండటం గర్వించదగ్గ పరిణామమ’ని మారుతీ ఎండీ, సీఈఓ హిసాషి టెకూచి పేర్కొన్నారు. ఆటోమేటిక్‌ మోడల్‌ లీటరుకు 16.94 కి.మీ., మాన్యువల్‌ మోడల్‌ లీటరుకు 16.39 కి.మీ. మైలేజీ ఇస్తుందని కంపెనీ తెలిపింది. మారుతీ సుజుకీ సబ్‌స్క్రైబ్ ద్వారా కూడా జిమ్నీని పొందవచ్చు. ఇందుకు నెలవారీ చందా రూ.33,550తో ప్రారంభం అవుతుంది. ఇప్పటికే ఎస్‌యూవీ విభాగంలో బ్రెజా, ఫ్రాంక్స్‌, గ్రాండ్‌ విటారా మోడళ్లను మారుతీ సుజుకీ విక్రయిస్తోంది. జపాన్‌కు చెందిన సుజుకీ ఇప్పటికే అంతర్జాతీయ విపణుల్లో 3 డోర్ల జిమ్నీని విక్రయిస్తోంది. 5 డోర్ల వేరియంట్‌ను మారుతీ సుజుకీ అభివృద్ధి చేసి దేశీయంగా విపణిలోకి తీసుకొచ్చింది.