దేశ వృద్ధిలో దక్షిణాది రాష్ట్రాలది కీలక పాత్ర

నీతి ఆయోగ్‌ మాజీ సీఈఓ అమితాబ్‌ కాంత్‌

చెన్నై: దేశ ఆర్థిక వృద్ధి ప్రస్తుత 7 శాతం నుంచి కనీసం 10 శాతానికి చేరితేనే తలసరి ఆదాయం పెరుగుతుందని నీతి ఆయోగ్‌ మాజీ సీఈఓ అమితాబ్‌ కాంత్‌ అంటున్నారు. సమ్మిళిత (కాంపౌండింగ్‌) వృద్ధి రేటు చాలా శక్తిమంతమైందని, భారత వృద్ధి 9 శాతం నమోదైతే తలసరి ఆదాయం 20,000 డాలర్ల (రూ.16,40,000)కు, 10 శాతం చొప్పున నమోదైతే 30,000 డాలర్ల (రూ.24,60,000)కు చేరుతుందని పేర్కొన్నారు. ‘ప్రస్తుత 7 శాతం నుంచి 10 శాతానికి వృద్ధి చేరాలంటే దేశంలోని ప్రతి రాష్ట్రం కూడా ఛాంపియన్‌లా అవతరించాలి. కనీసం 10-12 రాష్ట్రాలు 10 శాతానికి పైగా వృద్ధి నమోదు చేయాల్సిన అవసరం ఉంది. ఇందులో దక్షిణాది రాష్ట్రాలు కీలక పాత్ర పోషించాల్సి ఉంటుంద’ని భారత పరిశ్రమ సమాఖ్య దక్షిణాది ప్రాంతీయ మండలి సమావేశంలో అమితాబ్‌ కాంత్‌ వెల్లడించారు.