విపణిలోకి టాటా టిగోర్‌ విద్యుత్‌ వాహనాలు

ధరల శ్రేణి రూ.11.99-13.14 లక్షలు

దిల్లీ: టాటా మోటార్స్‌ తమ రెండో విద్యుత్‌ వాహనం టిగోర్‌ ఈవీలను మంగళవారం దేశీయ విపణిలోకి విడుదల చేసింది. వీటి ధరల శ్రేణి రూ.11.99-13.14 లక్షలు (ఎక్స్‌-షోరూమ్‌). ఈ మోడల్‌ 3 వేరియంట్లలో లభ్యమవుతుంది. వీటి ధరలు వరుసగా రూ.11.99 లక్షలు, రూ.12.49 లక్షలు, రూ.12.99 లక్షలు. డ్యూయల్‌ టోన్‌ టాప్‌-ఎండ్‌ మోడల్‌ ధర రూ.13.14 లక్షలుగా ఉంది. 70 నగరాల్లోని 150 విక్రయశాలల నుంచి ఈ వాహనాలను డెలివరీ చేయనుంది. ఈ మోడల్‌కు అంతర్జాతీయ ఎన్‌క్యాప్‌ నుంచి 4-స్టార్‌ భద్రతా రేటింగ్‌ లభించడంతో సహా 306 కి.మీ రేంజ్‌తో ఏఆర్‌ఏఐ ధ్రువీకరణ కూడా లభించింది. కంపెనీ హై వోల్టేజ్‌ ఎలక్ట్రిక్‌ ఆర్కిటెక్చర్‌ జిప్ట్రాన్‌ సాంకేతికతో ఈ మోడల్‌ రూపొందింది. సాంకేతికత, సౌకర్యం, భద్రత అనే మూడు ప్రధాన అంశాలను దృష్టిలో ఉంచుకొని ఈ మోడల్‌ను అభివృద్ధి చేశారు. 55 కిలోవాట్ల గరిష్ఠ సామర్థ్యం, 170 ఎన్‌ఎం టార్క్‌, 26 కిలోవాట్‌అవర్‌ లిక్విడ్‌-కూల్డ్‌, అధిక శక్తిమంత ఐపీ 67 రేటెడ్‌ బ్యాటరీ ప్యాక్‌ ఈ మోడల్‌ సొంతం. 8 ఏళ్లు లేదా 1,60,000 కి.మీ. వరకు బ్యాటరీ, మోటార్‌కు వారెంటీతో లభిస్తుంది.