అశోక్‌ లేలాండ్‌ ఎండీ, సీఈఓ విపిన్‌ రాజీనామా

ఎగ్జిక్యూటివ్‌ ఛైర్మన్‌గా ధీరజ్‌ హిందుజా

దిల్లీ: హిందుజా గ్రూప్‌ సంస్థ అశోక్‌ లేలాండ్‌ మేనేజింగ్‌ డైరెక్టర్‌ (ఎండీ), ముఖ్య కార్యనిర్వహణాధికారి (సీఈఓ) పదవులకు విపిన్‌ సోంధి వ్యక్తిగత కారణాలతో రాజీనామా చేసినట్లు కంపెనీ వెల్లడించింది. వ్యాపార కొనసాగింపులో భాగంగా ధీరజ్‌ హిందుజా ఎగ్జిక్యూటివ్‌ ఛైర్మన్‌గా బాధ్యతలు తీసుకున్నారని తెలిపింది. త్వరలోనే బోర్డు సమావేశమై, తదుపరి సీఈఓ, ఎండీని ఎంపిక చేస్తుందని అశోక్‌ లేలాండ్‌ తెలిపింది. ప్రస్తుతం నాన్‌-ఎగ్జిక్యూటివ్‌, స్వతంత్రేతర డైరెక్టర్‌-ఛైర్‌పర్సన్‌గా సేవలు అందిస్తున్న హిందుజా ఎగ్జిక్యూటివ్‌ ఛైర్మన్‌గా మారారని పేర్కొంది. 2021 డిసెంబరు 31న బాధ్యతల నుంచి తప్పుకోనున్న సోంధి, యాజమాన్య బదిలీ ప్రక్రియలో పూర్తి సహాయ సహకారాలు అందిస్తారని వివరించింది.