ఆన్‌లైన్‌లో ఆటో బుక్‌చేసుకుంటే 5% జీఎస్‌టీ

జనవరి 1 నుంచి అమల్లోకి

దిల్లీ: ఇ-కామర్స్‌ ప్లాట్‌ఫామ్‌ల ద్వారా ఆటో రిక్షా సేవలను అందిస్తే 5 శాతం జీఎస్‌టీ వర్తిస్తుందని ప్రభుత్వం వెల్లడించింది. 2022 జనవరి 1 నుంచి ఇది అమల్లోకి వస్తుందని పేర్కొంది. ఆర్థిక శాఖలోని రెవెన్యూ విభాగం నవంబరు 18న విడుదల చేసిన నోటిఫికేషన్‌ ద్వారా ఈ విషయాన్ని వెల్లడించింది. ఇ-కామర్స్‌ ప్లాట్‌ఫామ్‌ల ద్వారా ఆటో రిక్షా ప్రయాణ సేవలు అందించే సంస్థలకు జీఎస్‌టీ మినహాయింపును ఉపసంహరించకుంటున్నట్లు అందులో పేర్కొంది. అయితే సాధారణ రీతిలో అందించే సేవలకు మాత్రం జీఎస్‌టీ మినహాయింపు ఉంటుందని తెలిపింది.