యూబీఐకి రూ.1 కోటి జరిమానా: ఆర్‌బీఐ

దిల్లీ: నిబంధనలను పాటింలేదనే కారణంపై యూనియన్‌ బ్యాంక్‌ ఆఫ్‌ ఇండియా (యూబీఐ)కు రూ.1 కోటి జరిమానాను రిజర్వ్‌ బ్యాంక్‌ ఆఫ్‌ ఇండియా (ఆర్‌బీఐ) విధించింది. ‘రిజర్వ్‌ బ్యాంక్‌ ఆఫ్‌ ఇండియా (ఫ్రాడ్‌- క్లాసిఫికేషన్‌ అండ్‌ రిపోర్టింగ్‌ బై కమర్షియల్‌ బ్యాంక్స్‌ అండ్‌ సెలెక్ట్‌ ఎఫ్‌ఐస్‌’ మార్గదర్శకాలు 2016’, ‘గైడ్‌లైన్స్‌ ఆన్‌ సేల్‌ ఆఫ్‌ స్ట్రెస్డ్‌ అసెట్స్‌ బై బ్యాంక్స్‌’లో పొందుపరిచ్చిన కొన్ని నిబంధనలు, ఆదేశాలను యూబీఐ పాటించలేదంటూ నవంబరు 25 తేదీతో పంపిన ఆదేశాల్లో ఆర్‌బీఐ పేర్కొంది. ముందస్తు హెచ్చరిక సంకేతాలు ఉన్నప్పటికీ ఒక ఖాతాను రెడ్‌ ఫ్లాగ్‌ అకౌంట్‌గా వర్గీకరించడంలోనూ, వార్షిక  నివేదికలో సెక్యూరిటీ రిసీట్స్‌ కోసం చేసిన కేటాయింపుల వివరాలను పొందుపర్చడంలోనూ బ్యాంకు విఫలమైందని పేర్కొంది. నిబంధనలు పాటించనందునే ఈ జరిమానా విధించామని, వినియోగదార్లతో బ్యాంకు కుదుర్చుకున్న ఒప్పందం లేదా ఏదేని లావాదేవీని ప్రస్తావించాలనే ఉద్దేశంతో కాదని ఆర్‌బీఐ తెలిపింది.