డిసెంబరులో 80-85 శాతం ఉత్పత్తి: మారుతీ

దిల్లీ: మారుతీ సుజుకీ కార్ల తయారీపై సెమీ కండక్టర్ల కొరత ప్రభావం వరుసగా ఐదో నెలా కొనసాగనుంది. ఎప్పుడూ తయారు చేసే పరిమాణంతో పోలిస్తే డిసెంబరులో 15-20% తక్కువగా .. అంటే సాధారణ స్థాయిలో 80-85% మేర కార్లు తయారు చేయగలమని కంపెనీ వెల్లడించింది. సెమీకండక్టర్ల కొరత నేపథ్యంలో ఎలక్ట్రానిక్‌ విడిభాగాల సరఫరాకు అవరోధాలు ఎదురవుతుండటమే ఇందుకు కారణంగా పేర్కొంది. ఈ పరిణామం హరియాణా, గుజరాత్‌లోని కంపెనీ ప్లాంట్లలో తయారీపై ప్రతికూల ప్రభావం చూపించే అవకాశం ఉందని స్టాక్‌ ఎక్స్ఛేంజీలకు మారుతీ సుజుకీ తెలియజేసింది.  

ఈకో వ్యాన్‌ రూ.8000 ప్రియం: ఈకో వ్యాన్‌ ధరను రూ.8,000 పెంచుతున్నట్లు మారుతీ సుజుకీ తెలిపింది. కొత్తగా ఎయిర్‌బ్యాగ్‌లను అమర్చడం వల్ల ధర పెంచాల్సి వచ్చిందని పేర్కొంది. నవంబరు 30 నుంచి ఈ పెరిగిన ధర అమల్లోకి వచ్చిందని ఎక్స్ఛేంజీలకు తెలియజేసింది. ఈకో వ్యాన్‌ ప్రయాణికుల రకం ధర రూ.4.3 - 5.6 లక్షల మధ్య ఉండగా.. అంబులెన్స్‌ రకం ధర రూ.7.29 లక్షలు (ఎక్స్‌షోరూం, దిల్లీ).