అక్టోబరులో కీలక రంగాల వృద్ధి 7.5%

దిల్లీ: ఈ ఏడాది అక్టోబరులో 8 కీలక రంగాల ఉత్పత్తి 7.5 శాతం మేర వృద్ధి చెందినట్లు వాణిజ్య, మంత్రిత్వ శాఖ వెల్లడించింది. బొగ్గు, సహజ వాయువు, రిఫైనరీ ఉత్పత్తులు, సిమెంట్‌ విభాగాలు ఆరోగ్యకర వృద్ధి నమోదు చేశాయి. 2020 అక్టోబరులో 8 కీలకరంగాల ఉత్పత్తి 0.5% మేర క్షీణించింది. గత సెప్టెంబరులో కీలక రంగాల వృద్ధి 4.5 శాతంగా నమోదైంది. పారిశ్రామికోత్పత్తి సూచీలో (ఐఐపీ) ఈ 8 కీలక రంగాలకు 40.27 శాతం వాటా ఉంటుంది.

* 2020 అక్టోబరుతో పోలిస్తే గత నెలలో బొగ్గు 14.6 శాతం, సహజ వాయువు 25.8%, సిమెంట్‌ 14.5% రిఫైనరీ ఉత్పత్తులు 14.4% మేర వృద్ధి చెందాయి. ముడి చమురు ఉత్పత్తి 2.2 శాతం తగ్గింది. ఎరువులు, ఉక్కు, విద్యుదుత్పత్తి 0.04%, 0.9%, 2.8% చొప్పున క్షీణించాయి.