10 నెలల గరిష్ఠానికి ‘తయారీ’

దిల్లీ: భారత తయారీ రంగ కార్యకలాపాలు మరింత బలోపేతమయ్యాయి. మార్కెట్‌ పరిస్థితులు మెరుగుపడడంతో ఉత్పత్తి, విక్రయాల్లో భారీ వృద్ధి నమోదైందని ఐహెచ్‌ఎస్‌ మార్కిట్‌ ఇండియా మాన్యుఫాక్చరింగ్‌ పర్చేజింగ్‌ మేనేజర్స్‌ ఇండెక్స్‌(పీఎమ్‌ఐ) తెలిపింది. అక్టోబరులో 55.9గా ఉన్న పీఎమ్‌ఐ నవంబరులో 57.6కు చేరుకుంది. ఫిబ్రవరి తర్వాత నమోదైన అత్యధిక గణాంకాలివే. అదీ కాక దీర్ఘకాల సగటు అయిన 53.6 కంటే అధికంగా నమోదు కావడం గమనార్హం. మూడు నెలల పాటు ఉద్యోగాల్లో కోతల అనంతరం నియామకాలు పుంజుకున్న సంకేతాలు కనిపించాయి. పీఎమ్‌ఐ సంఖ్య 50కి పైన ఉంటే వృద్ధిగా.. కింద ఉంటే క్షీణతగా భావిస్తారన్న సంగతి తెలిసిందే. సెప్టెంబరు త్రైమాసిక జీడీపీ వృద్ధి సైతం అంచనాల కంటే మెరుగ్గా 8.4 శాతంగా నమోదైన విషయం తెలిసిందే.