దేశవ్యాప్తంగా ఒకే విధానాన్ని పాటిద్దాం :ఫిక్కీ

కొవిడ్‌-19 కొత్త వేరియంట్‌ ‘ఒమిక్రాన్‌’ నియంత్రణకు దేశవ్యాప్తంగా ఒకటే తరహా విధానాన్ని ప్రభుత్వం అమలు చేయాలని పరిశ్రమ సంఘం ఫిక్కీ సూచించింది. ముఖ్యంగా రాష్ట్రాలు, నగరాలు, పట్టణాల ప్రవేశాల వద్ద ఒకే పద్ధతి పాటించడం ఎంతో అవసరమని, ఇందులో ఏమాత్రం తేడాలున్నా ఒకదాని ప్రభావం మరోదానిపై పడుతుందని అభిప్రాయపడింది. అప్రమత్తతతో వ్యవహరించడంతో పాటు, ఆర్‌టీ- పీసీఆర్‌ పరీక్షా కిట్‌లను మరింతగా సమకూర్చుకోవడం ముఖ్యమని పేర్కొంది. కొవిడ్‌ వైరస్‌ వేరియంట్ల పరిశీలన నిమిత్తం జెనోమ్‌ సీక్వెన్సింగ్‌ ప్రయోగ కేంద్రాలను కూడా పెంచాలని సూచించింది. కొవిడ్‌-19 ముప్పు పూర్తిగా తొలగలేదని చెప్పడానికి ఒమిక్రాన్‌ వేరియంట్‌ నిదర్శనమని తెలిపింది. కొవిడ్‌-19 టీకా రెండు డోసులు వేసుకోవడం, మాస్క్‌ ధరించడం సహా పలు జాగ్రత్తలు పాటించడం ఇప్పుడు చాలా అవసరమని పేర్కొంది. లేనిపోని వదంతులతో ప్రజలను భయాందోళనలకు గురి చేసేందుకు, వారి జీవన విధానానికి అంతరాయాలు సృష్టించే పరిణామాలు చోటుచేసుకునేందుకూ ఆస్కారం ఉందని, ఈ విషయంలో అప్రమత్తంగా ఉండాలని ఫిక్కీ వివరించింది.