కరెంటు ఖాతా లోటు

 అంచనా పెంచిన బార్‌క్లేస్‌ జీడీపీలో 1.9 శాతానికి 

ముంబయి: ప్రస్తుత ఆర్థిక సంవత్సరానికి భారత కరెంటు ఖాతా లోటు (సీఏడీ) అంచనాలను విదేశీ బ్రోకరేజీ సంస్థ బార్‌క్లేస్‌ పెంచింది. జీడీపీలో 1.9 శాతానికి అంటే 60 బిలియన్‌ డాలర్ల (సుమారు రూ.4.50 లక్షల కోట్ల)కు చేరొచ్చని పేర్కొంది. ఇంతకుముందు కరెంటు ఖాతా లోటును 45 బిలియన్‌ డాలర్లు ఉండొచ్చని సంస్థ అంచనా వేసింది. నవంబరు నెలలో దిగుమతులు ఏడాది క్రితంతో పోలిస్తే 57.2 శాతం పెరగడంతో, వాణిజ్య లోటు రికార్డు స్థాయిలో 23.27 బిలియన్‌ డాలర్లకు చేరడం ఇందుకు కారణమని పేర్కొంది. ఎగుమతుల్లో వృద్ధి దిగుమతుల స్థాయి కంటే తక్కువగా ఉండటం, దేశీయ వ్యాపార కార్యకలాపాల్లో స్తబ్దత, కమొడిటీ ధరలు పెరగడం వల్ల వాణిజ్య లోటు పెరగడం కొనసాగుతోందని బార్‌క్లేస్‌ తెలిపింది.