బౌన్స్‌ ఇన్ఫినిటీ ఇ1

 ప్రారంభ ధర రూ.45,099
బ్యాటరీ సహా రూ.68,999

బెంగళూరు: విద్యుత్‌ వాహన (ఈవీ) సంస్థ బౌన్స్‌ తమ విద్యుత్తు-స్కూటర్‌ ‘ఇన్ఫినిటీ ఇ1’ను విపణిలోకి విడుదల చేసింది. ఈ వాహనం ప్రారంభ ధర రూ.45,099 (ఎక్స్‌-షోరూమ్‌, దిల్లీ). బ్యాటరీ, ఛార్జర్‌తో కలిపి స్కూటర్‌ కొనుగోలు చేయాలంటే రూ.68,999 (ఎక్స్‌-షోరూమ్‌, దిల్లీ) చెల్లించాలి. అదే బ్యాటరీ కొనుగోలు చేయకుండా, బ్యాటరీ యాజ్‌-ఎ-సర్వీస్‌ ఆప్షన్‌ను ఎంపిక చేసుకుంటే రూ.45,099 చెల్లిస్తే సరిపోతుంది. బ్యాటరీ యాజ్‌ ఏ సర్వీస్‌ ఆప్షన్‌ ఆఫర్‌ ఇవ్వడం దేశీయ ఇ-స్కూటర్‌ విపణిలో ఇదే తొలిసారి అని కంపెనీ తెలిపింది. ఇ-స్కూటరును రూ.499తో ముందస్తు బుకింగ్‌ చేసుకోవచ్చని, ఫేమ్‌-2 ప్రోత్సాహకాలు వర్తిస్తాయని బౌన్స్‌ సహ వ్యవస్థాపకులు, సీఈఓ వివేకానంద హల్లేకెరె వెల్లడించారు. మార్చి త్రైమాసికం చివర్లో దేశ వ్యాప్తంగా డెలివరీలు ప్రారంభిస్తామని తెలిపారు. 48వీ 39 ఏహెచ్‌, పోర్టబుల్‌ బ్యాటరీతో ఇ-స్కూటర్లు లభిస్తాయి. 4-5 గంటల్లో పూర్తి ఛార్జింగ్‌ అవుతుందని,  85 కి.మీ ప్రయాణించవచ్చని సంస్థ తెలిపింది. భివండీ ప్లాంట్‌లో ఏడాదికి 1,80,000 స్కూటర్లను ఉత్పత్తి చేసే సామర్థ్యం ఉందని, దక్షిణాదిన మరో ప్లాంట్‌ నెలకొల్పే ప్రణాళిక ఉన్నట్లు వివరించింది.