మా సంస్థలో వాటాను ఎయిర్‌టెల్‌  కొనుగోలు చేయడం లేదు: డిష్‌టీవీ

దిల్లీ: డిష్‌టీవీ ఇండియాలో భారతీ ఎయిర్‌టెల్‌ మెజార్టీ వాటా కొనుగోలు చేయనున్నట్లు వస్తున్న వార్తలను డిష్‌టీవీ కొట్టిపారేసింది. అందులో ఎలాంటి నిజం లేదని స్పష్టం చేసింది. డిష్‌టీవీలో ప్రమోటర్ల గ్రూపు, యెస్‌ బ్యాంకుకున్న వాటాలో 5.93 శాతం వాటా కొనుగోలు నిమిత్తం భారతీ ఎయిర్‌టెల్‌ ప్రాథమిక చర్చలు జరుపుతోందని ఓ ఆంగ్లపత్రిక వెల్లడించింది. దీనిపై స్పందిస్తూ ‘షేరు ధరపై ప్రభావం చూపించే ఎలాంటి సమాచారమైనా సెబీ నిబంధనల ప్రకారం వెల్లడించాల్సి ఉంటుంది.  ప్రస్తుతం మా వద్ద అటువంటి సమాచారం ఏదీ లేదనే విషయాన్ని మీ దృష్టికి తీసుకొస్తున్నాం. ఆ వార్తాకథనంలో చెప్పిన లావాదేవీ గురించి మాకు తెలియదు’ అని ఎక్స్ఛేంజీలకు డిష్‌టీవీ తెలియజేసింది.