హిందీలో లింక్డ్‌ఇన్‌

బెంగళూరు: వృత్తిపరమైన సామాజిక మాధ్యమం లింక్డ్‌ఇన్‌ గురువారం నుంచి హిందీ భాషలోనూ సేవలందిస్తోంది. లింక్డ్‌ఇన్‌కు ఇది తొలి భారతీయ భాష కావడం విశేషం. భారత్‌తో పాటు ప్రపంచవ్యాప్తంగా ఉంటూ, హిందీలో మాట్లాడేవారు.. ఉద్యోగావకాశాల సమాచారం తెలుసుకునేందుకు ఇది దోహదపడుతుందని కంపెనీ తెలిపింది. ప్రపంచవ్యాప్తంగా లింక్డ్‌ఇన్‌ 25 భాషల్లో సేవలు అందిస్తోంది. మొదటి దశలో భాగంగా డెస్క్‌టాప్‌, మొబైల్‌ ఆండ్రాయిడ్‌, ఐఓఎస్‌ ప్లాట్‌ఫామ్‌లపై హిందీలో ఫీడ్‌, ప్రొఫైల్‌, ఉద్యోగాలు, మెసేజింగ్‌, కంటెంట్‌ సృష్టించడం వంటి వాటిని సభ్యులు చేయొచ్చని లింక్డ్‌ఇన్‌ తెలిపింది. లింక్డ్‌ఇన్‌కు అంతర్జాతీయంగా 80 కోట్ల మంది సభ్యులు ఉండగా, భారత్‌లో 8.2 కోట్ల మంది వినియోగదారులు ఉన్నారు.