చిన్న వ్యాపారాలకు సులభంగా రుణాలు

 అందుకనువైన డిజిటల్‌ ప్లాట్‌ఫామ్‌ సిద్ధం చేయండి
 బ్యాంకులకు కేంద్ర ఐటీ మంత్రి అశ్వినీ వైష్ణవ్‌ సూచన

దిల్లీ: చెల్లింపులకు ఎంతో అనువుగా ఉన్న యూపీఐ (యూనిఫైడ్‌ పేమెంట్స్‌ ఇంటర్‌ఫేస్‌) తరహాలో, చిన్న వ్యాపారా (ఎంఎస్‌ఎంఈ)లకు సులభంగా రుణాలు అందించేందుకు పటిష్ఠమైన, ఎలాంటి అవరోధాలు లేని సరికొత్త డిజిటల్‌ ప్లాట్‌ఫామ్‌ను రూపొందించాలని బ్యాంకులకు కేంద్ర ఐటీ మంత్రి అశ్వినీ వైష్ణవ్‌ విజ్ఞప్తి చేశారు. అలాంటి ప్లాట్‌ఫామ్‌ను సిద్ధం చేసేందుకు అనువైన వ్యవస్థలు అందుబాటులో ఉన్నాయని పేర్కొన్నారు. ఆధార్‌, మొబైల్‌ ఫోన్‌, యూపీఐ ప్లాట్‌ఫామ్‌, డిజిలాకర్‌ వంటి వాటిని వినియోగించుకుని వినూత్న ఆలోచనతో 3 నెలల్లో తమ ముందుకు రావాలని బ్యాంకింగ్‌ పరిశ్రమకు సూచించారు. డిజిటల్‌ రంగంలో భారత్‌ సాధించిన ప్రగతిని చూపించడం కోసం వారం రోజులుగా నిర్వహిస్తున్న ‘అజాదీ కా డిజిటల్‌ మహోత్సవ్‌’లో భాగంగా ఏర్పాటు చేసిన ‘డిజిటల్‌ పేమెంట్‌ ఉత్సవ్‌’ కార్యక్రమంలో వైష్ణవ్‌ మాట్లాడారు. సమాజంలో కింది స్థాయిలో ఉన్న వారికి, వీధి వ్యాపారులకు సులభంగా రుణ సదుపాయం కల్పించేందుకు బలమైన, వినూత్న ప్లాట్‌ఫామ్‌ను సిద్ధం చేయాలని బ్యాంకులను కోరారు.