జీఎస్‌ఎస్‌ ఇన్ఫోటెక్‌ చేతికి ‘పొలిమేరాస్‌’

ఈనాడు, హైదరాబాద్‌: రైతుల నుంచి కూరగాయలు సేకరించి నేరుగా వినియోగదార్లకు విక్రయించే ‘పొలిమేరాస్‌’ అనే సంస్థను హైదరాబాద్‌కు చెందిన జీఎస్‌ఎస్‌ ఇన్ఫోటెక్‌ లిమిటెడ్‌ కొనుగోలు చేసింది. రూ.250 కోట్ల సంస్థాగత విలువకు దీన్ని సొంతం చేసుకున్నట్లు జీఎస్‌ఎస్‌ ఇన్ఫోటెక్‌ వెల్లడించింది. ఇందుకు కొంత నగదు చెల్లించడంతో పాటు మిగిలిన మొత్తానికి ఈక్విటీ షేర్లు జారీ చేయనున్నట్లు పేర్కొంది. అన్ని రకాల వృద్ధి అవకాశాలను అందిపుచ్చుకోవాలనేది తమ ఉద్దేశమని, ఇందులో భాగంగా ‘పొలిమేరాస్‌’ను కొనుగోలు చేసినట్లు జీఎస్‌ఎస్‌ ఇన్ఫోటెక్‌ జీఈఓ భార్గవ్‌ మారుపల్లి వివరించారు. హైదరాబాద్‌, బెంగళూరు నగరాల్లో 75 విక్రయ కేంద్రాలను నిర్వహిస్తున్న ‘పొలిమేరాస్‌’, ఈ సంఖ్యను 100కు పెంచుకోవాలనే ఆలోచన ఉంది.