‘ఒమిక్రాన్‌’కు జీఎస్‌కే మందు

దిల్లీ: కరోనా వైరస్‌ ‘ఒమిక్రాన్‌’ వేరియంట్‌పై తాము అభివృద్ధి చేసిన యాంటీబాడీ ఆధారిత చికిత్స సత్ఫలితాలు ఇస్తున్నట్లు అగ్రశ్రేణి ఔషధ సంస్థ జీఎస్‌కే (గ్లాక్సో స్మిత్‌ క్లైన్‌) వెల్లడించింది. అమెరికాలోని తన భాగస్వామి వీర్‌ బయోటెక్నాలజీతో కలిసి ‘సొట్రొవిమ్యాబ్‌’ అనే ఔషధంతో ఈ యాంటీబాడీ చికిత్సను ఆవిష్కరించినట్లు జీఎస్‌కే తెలిపింది. ‘సొట్రొవిమ్యాబ్‌’ ప్రభావశీలతను ఒమిక్రాన్‌ కీలక మ్యుటేషన్లపైనా గుర్తించినట్లు జీఎస్‌కే వివరించింది. క్లినికల్‌ పరీక్షల్లో ఇది చూపిన ఫలితాలను అగ్రశ్రేణి వైద్య పత్రికలు సమీక్షించాల్సి (పీర్‌-రివ్యూ) ఉంది. ఇప్పటి వరకు గుర్తించిన 37 రకాలైన కరోనా వైరస్‌ రకాలపై (వేరియంట్లు) ఈ ఔషధం బాగా పనిచేస్తోందని జీఎస్‌కే పేర్కొంది.