Loan: రుణ దరఖాస్తు తిరస్కరిస్తే

ఇల్లు, కారు కొనాలనుకున్నప్పుడు బ్యాంకు నుంచి రుణం తీసుకోవడం సర్వసాధారణం. కానీ, అనుకోకుండా రుణ దరఖాస్తు తిరస్కరిస్తే.. అప్పుడు ఎంత కష్టం.. ఇలాంటి అనుభవం ఎదురైనప్పుడు ఏం చేయాలి? రానున్న రోజుల్లో కొత్త అప్పు తీసుకునేందుకు అర్హత ఎలా సంపాదించాలి? వీటి గురించి తెలుసుకుందాం..

కారణాలు సరైనవేనా?

ముందుగా రుణ దరఖాస్తును ఎందుకు తిరస్కరించారన్నది ఆరా తీయండి. సాధారణంగా రుణ సంస్థ ఈ విషయాన్ని స్పష్టంగానే తెలియజేస్తుంది. క్రెడిట్‌ స్కోరు తక్కువగా ఉండటం (700 లోపు), సరిపోయినంత ఆదాయం లేకపోవడం, ఇప్పటికే అధికంగా అప్పులు తీసుకోవడం, వాయిదాలు ఆలస్యంగా చెల్లించడం, కొన్ని చెల్లించకపోవడం, తరచూ ఉద్యోగాలు మారడం, కొంటున్న ఇల్లు విషయంలో వివాదాలకు ఆస్కారంలాంటివి ప్రధానంగా కారణమవుతాయి. క్రెడిట్‌ నివేదికలో పొరపాట్ల వల్లా ఒక్కోసారి రుణ దరఖాస్తును తిరస్కరించే ఆస్కారం ఉంది. ఉదాహరణకు పాన్‌ తప్పుగా నమోదు కావడం, ఇతరుల రుణాలు మీ నివేదికలో ఉండొచ్చు. అందుకే, తిరస్కరణకు కారణాలేమిటన్నది రుణ సంస్థ నుంచి స్పష్టంగా తెలుసుకోవాలి.

స్కోరు పెరిగేలా..

క్రెడిట్‌ నివేదిక, స్కోరు సరిగా ఉండాలంటే.. వాయిదాలు సరైన సమయంలో చెల్లించాలి. 750కి మించి క్రెడిట్‌ స్కోరు ఉన్నప్పుడు రుణ దరఖాస్తును తిరస్కరించే అవకాశాలు తక్కువ. స్కోరు తక్కువగా ఉన్న కారణంతోనే దరఖాస్తు వెనక్కి వస్తే.. స్కోరు పెంచుకునే ప్రయత్నం చేయాలి. వాయిదాలు, క్రెడిట్‌ కార్డు బిల్లులను సకాలంలో చెల్లించడం ద్వారా క్రమంగా స్కోరు పెరుగుతుంది. కొన్ని రోజులపాటు క్రెడిట్‌ కార్డులను తక్కువగా వాడాలి. ఇప్పటికే ఉన్న పాత క్రెడిట్‌ కార్డులను రద్దు చేసుకోవద్దు. కొత్త కార్డులకు దరఖాస్తు చేయడం వల్ల స్కోరుపై ప్రతికూల ప్రభావం చూపిస్తుంది. ఇప్పటికే ఉన్న రుణాలు, వాటికి చెల్లిస్తున్న ఈఎంఐల లెక్కలూ కొత్త రుణ సంస్థ చూస్తుంది. మీ మొత్తం ఆదాయంలో 55-60 శాతానికి మించకుండా ఈఎంఐ ఉండాలి. ఇప్పటికే మీ ఆదాయంలో వాయిదాల నిష్పత్తి ఈ స్థాయికి చేరుకుంటే.. బ్యాంకులు కొత్త రుణం ఇచ్చేందుకు ఆలోచిస్తాయి. అంతేకాదు.. మీ పాన్‌, ఆధార్‌, ఇతర ధ్రువీకరణల్లో మీ పేరు ఇతర వివరాలు అన్నీ సరిగ్గా ఉండేలా చూసుకోండి. కొన్నిసార్లు ఇవీ రుణ దరఖాస్తు తిరస్కరణకు కారణమయ్యే అవకాశం ఉంది.

కొత్తగా వద్దు..

కొత్తగా రుణం లేదా క్రెడిట్‌ కార్డు కోసం దరఖాస్తు చేసుకున్న ప్రతిసారీ ఆ వివరాలు క్రెడిట్‌ నివేదికలో నమోదవుతాయి. ఇవి క్రెడిట్‌ స్కోరును తగ్గించేందుకూ కారణమవుతాయి. స్వల్పకాలంలోనే ఎక్కువ రుణాలకు దరఖాస్తు చేసుకోవడం ఎప్పుడూ మంచిది కాదు. ఒకసారి దరఖాస్తు తిరస్కరిస్తే.. ఆ తర్వాత కూడా ఇదే జరిగే అవకాశాలు ఎక్కువగా ఉంటాయి. అందుకే, ఒకేసారి రెండు మూడు రుణ సంస్థలను సంప్రదించకూడదు. ఇలా చేయడం వల్ల రుణాల కోసం ఆరాటపడుతున్నారని రుణ సంస్థలు భావిస్తాయి. అది మీకు ఇబ్బందిగా మారుతుంది.

నివేదిక చూశారా

క్రెడిట్‌ స్కోరును ఎప్పటికప్పుడు తెలుసుకునేందుకు నెలకోసారైనా దీనికోసం దరఖాస్తు చేసుకోవచ్చు. ఇప్పుడు చాలా సంస్థలు దీన్ని ఉచితంగానే అందిస్తున్నాయి. ఎక్స్‌పీరియన్‌, సిబిల్‌ నుంచీ నెలకోసారి ఉచితంగా నివేదిక పొందవచ్చు. ఈ నివేదికలో మీ రుణాలకు సంబంధించిన అన్ని లావాదేవీలూ ఉంటాయి. ఒక రకంగా ఇది మీ ఆర్థికారోగ్యానికి సూచిక. నెలనెలా తనిఖీ చేసుకోవడం వల్ల పొరపాట్లనూ తొందరగా గుర్తించేందుకు వీలవుతుంది.

750 దాటితేనే..

ఒకసారి దరఖాస్తు వెనక్కి వచ్చిన తర్వాత స్కోరు పెరిగేంత వరకూ తిరిగి కొత్త అప్పుల కోసం వెళ్లకూడదు. స్కోరు పెరిగేందుకు కనీసం 4-12 నెలలు వేచి చూడాలి. ఇప్పటికే మీకు 750 స్కోరు ఉంటే.. తక్కువ సమయంలోనే ఇది పెరుగుతుంది. వాయిదాలు, బిల్లులను సకాలంలో చెల్లించడం ద్వారా సులువుగా స్కోరు మెరుగవుతుంది. అన్నీ సానుకూలంగా ఉన్నాయి అనుకున్నప్పుడే కొత్త రుణం కోసం దరఖాస్తు చేసుకోవడం మేలు.

- అధిల్‌ శెట్టి, సీఈఓ, బ్యాంక్‌బజార్‌.కామ్‌