అబాకస్‌.ఏఐలో 200 ఉద్యోగాలు

రూ.370 కోట్ల కొత్త పెట్టుబడులు

దిల్లీ: కృత్రిమ మేధ రంగంలోని అబాకస్‌.ఏఐ రానున్న మూడేళ్లలో రూ.370 కోట్ల (50 మిలియన్‌ డాలర్లు) పెట్టుబడులు పెట్టేందుకు సిద్ధమవుతోంది. ముంబయిలోని పరిశోధన, అభివృద్ధి కేంద్రాన్ని విస్తరించేందుకు ఈ పెట్టుబడులను వినియోగించనున్నట్లు సంస్థ తెలిపింది. ప్రస్తుతం 20 మంది ఇంజినీర్లు, శాస్త్రవేత్తలను నియమించుకోవడంతో ప్రారంభించి, మూడేళ్లలో ఈ సంఖ్యను 200కు పెంచుతామని పేర్కొంది. చిన్న, పెద్దస్థాయి సంస్థలకు కృత్రిమ మేధ సేవలను అందించేందుకు ఆర్‌అండ్‌డీ కేంద్రం ఉపయోగపడుతుంది. బిందూ రెడ్డి, సిద్ధార్థ నాయుడు, అరవింద్‌ సౌందరరాజన్‌ ప్రారంభించిన ఈ సంస్థ ప్రధానంగా క్లౌడ్‌ ఏఐ, మెషిన్‌, డీప్‌ లెర్నింగ్‌లపై పనిచేస్తుంది. ఇప్పటికే ఈ సంస్థ 90 మిలియన్‌ డాలర్ల పెట్టుబడులను సమీకరించింది. ప్రపంచ వ్యాప్తంగా విస్తరించడం కోసం మరిన్ని పెట్టుబడులను సమీకరించే ప్రయత్నాల్లో ఉంది. మారుతున్న వినియోగదారుల అభిరుచికి తోడు, గిరాకీని తట్టుకునేందుకు సంస్థలకు కృత్రిమ మేధ, క్లౌడ్‌ కంప్యూటింగ్‌, మెషీన్‌- డీప్‌ లెర్నింగ్‌ సేవలు అవసరమవుతున్నాయని సంస్థ సీఈఓ బిందు రెడ్డి అన్నారు.