భారత్‌ హవా నడుస్తోంది

అనుకూలతలను అందిపుచ్చుకోవాలి
డెలాయిట్‌ సీఈఓ

దిల్లీ: విదేశీ ప్రత్యక్ష పెట్టుబడులకు ఆకర్షణీయ గమ్యస్థానంగా కొనసాగాలంటే తగిన పరిస్థితులను భారత్‌ సృష్టించుకోవాల్సిన అవసరం ఉందని డెలాయిట్‌ సీఈఓ పునిత్‌ రెంజెన్‌ తెలిపారు. కొవిడ్‌-19పై జరుపుతున్న పోరాటంలోనూ విజయవంతం అవుతామనే నమ్మకాన్ని కల్పించాలని పేర్కొన్నారు. ప్రస్తుతం భారత్‌కు అనుకూలంగా పరిస్థితులు ఉన్నాయని, వాటిని అందిపుచ్చుకోవాలని సూచించారు. 2022లో అత్యంత వేగంగా అభివృద్ధి చెందుతున్న దేశంగా భారత్‌ నిలుస్తుందని, 8-9 శాతం మధ్య వృద్ధి రేటు నమోదయ్యే అవకాశం ఉందని తెలిపారు. ఆర్థిక వ్యవస్థ వృద్ధికి కొవిడ్‌-19 మహమ్మారి అవరోధంగా నిలుస్తోందని, ముందుగా దీనిపై పోరాటంలో విజయవంతం అయ్యేందుకు దృష్టి సారించాలని అన్నారు. కొవిడ్‌-19 కొత్త వేరియంట్‌ ఒమిక్రాన్‌ ప్రభావం అందరిపైనా ఉంటుందని.. ప్రపంచం, సరఫరా వ్యవస్థలు సహా భారత్‌పైనా ప్రభావం చూపుతుందని చెప్పారు. అతిపెద్ద ఆర్థిక వ్యవస్థల్లో వృద్ధిపరంగా భారత్‌ ముందు ఉంటుందని తాను భావిస్తున్నట్లు తెలిపారు. రాబోయే పదేళ్లలో భారత్‌ 6-8 లక్షల కోట్ల డాలర్ల ఆర్థిక వ్యవస్థగా అవతరిస్తుందని, పరిమాణం పరంగా మూడో స్థానంలో ఉంటుందని తాను అంచనా వేస్తున్నట్లు చెప్పారు.