రూ.3,500 కోట్లు సాయం చేస్తారా?

 అమెజాన్‌కు ఫ్యూచర్‌ రిటైల్‌ డైరెక్టర్ల లేఖ

దిల్లీ: రుణదాతలకు ఈ నెల 29లోగా చెల్లించాల్సిన బకాయిల కోసం రూ.3,500 కోట్లు ఇచ్చే అంశంపై   స్పష్టత ఇవ్వాల్సిందిగా అమెజాన్‌ను ఫ్యూచర్‌ రిటైల్‌ స్వతంత్ర డైరెక్టర్లు కోరారు. బ్యాంకులు, ఉద్యోగులు, వెండర్లు, ఇతర వాటాదార్లకు ఇవ్వాల్సిన నిధులకు సంబంధించి పరిష్కార ప్రతిపాదనలను అమెజాన్‌ ఇస్తే, వాటిని ఫ్యూచర్‌ రిటైల్‌ న్యాయపరమైన నిబంధనలకు లోబడి మదింపు చేస్తామని స్వతంత్ర డైరెక్టర్లు పేర్కొన్నారు. కంపెనీ ఆర్థిక ఇబ్బందులు తీర్చడంలో సహాయపడతామని సూచిస్తూ, ఫ్యూచర్‌ రిటైల్‌ స్వతంత్ర డైరెక్టర్లకు ఈ నెల 19న అమెజాన్‌ లేఖ రాసింది. దీనిపై ఫ్యూచర్‌ కంపెనీ స్వతంత్ర డైరెక్టర్లు స్పందించారు. ఈ నెల 29లోగా రూ.3,500 కోట్లు బకాయిలు చెల్లించడానికి మూలధన సాయం అవసరమని, లేకుండా మొండి బకాయి (ఎన్‌పీఏ)గా మారుతామని తెలిపారు. అందువల్ల శనివారం (నేడు)లోగా స్పష్టత ఇస్తే ప్రతిపాదనలను పరిశీలిస్తామని ఫ్యూచర్‌ డైరెక్టర్లు వివరించారు. దీనిపై అమెజాన్‌, ఫ్యూచర్‌ గ్రూప్‌ అధికారికంగా స్పందించలేదు.