తాన్లా ఆదాయం రూ.885 కోట్లు

ఈనాడు, హైదరాబాద్‌: హైదరాబాద్‌కు చెందిన కమ్యూనికేషన్‌ సేవల సంస్థ తాన్లా ప్లాట్‌ఫామ్స్‌ ప్రస్తుత ఆర్థిక సంవత్సరం మూడో త్రైమాసికంలో రూ.884.9 కోట్ల ఆదాయాన్ని ఆర్జించింది. 2020-21 ఇదేకాల ఆదాయం రూ.654.1 కోట్లతో పోలిస్తే ఇది 35.3శాతం అధికం. ఇదే సమయంలో నికర లాభం రూ.93.5 కోట్ల నుంచి 69శాతం వృద్ధి చెంది రూ.158 కోట్లకు చేరింది. మూడు త్రైమాసికాల్లో కలిపి మొత్తం ఆదాయం రూ.2352.9 కోట్లు, నికర లాభం రూ.398.7 కోట్లుగా ఉంది. అన్ని విభాగాల్లో మెరుగైన పనితీరుతో మంచి ఫలితాలు సాధించినట్లు తాన్లా ప్లాట్‌ఫామ్స్‌ వ్యవస్థాపక ఛైర్మన్‌, సీఈఓ ఉదయ్‌ రెడ్డి అన్నారు. వరుసగా 22 త్రైమాసికాల్లో వృద్ధి నమోదు  చేసినట్లు పేర్కొన్నారు.