34 శాతం పెరిగిన గ్లాండ్‌ ఫార్మా లాభం

ఈనాడు, హైదరాబాద్‌: గ్లాండ్‌ ఫార్మా ఈ ఆర్థిక సంవత్సరం మూడో త్రైమాసికంలో రూ. 273 కోట్ల నికరలాభాన్ని ఆర్జించింది. 2020-21 ఇదేకాల లాభం రూ.204 కోట్లతో పోలిస్తే, ఈసారి 34 శాతం పెరిగింది. ఇదే సమయంలో త్రైమాసిక ఆదాయం రూ.859 కోట్ల నుంచి 24 శాతం వృద్ధితో రూ.1,063 కోట్లకు పెరిగింది. ప్రస్తుత ఆర్థిక సంవత్సరం మొదటి 9 నెలల కాలానికి గ్లాండ్‌ ఫార్మా ఆదాయం రూ.3,297 కోట్లు, నికరలాభం రూ.925 కోట్లు నమోదయ్యాయి. అమెరికా మార్కెట్లో తమ అమ్మకాలు 23 శాతం పెరిగాయని, ఇతర దేశాల్లోనూ వృద్ధికి ప్రయత్నిస్తున్నట్లు గ్లాండ్‌ ఫార్మా సీఈఓ శ్రీనివాస్‌ సాదు తెలిపారు. సమీక్షా త్రైమాసికంలో 4 సంక్లిష్ట ఇంజెక్టబుల్‌ ఔషధాలకు అనుమతి కోసం దరఖాస్తు చేశామని, తద్వారా సమీప భవిష్యత్తులో ఇదే తరహా వృద్ధిని కొనసాగించటానికి సిద్ధమవుతున్నట్లు వివరించారు.