బంధన్‌ బ్యాంక్‌ ఆకర్షణీయ ఫలితాలు

ముంబయి: డిసెంబరు త్రైమాసికంలో బంధన్‌ బ్యాంక్‌ రూ.859 కోట్ల నికర లాభాన్ని ప్రకటించింది. 2020-21 ఇదే కాల లాభం రూ.633 కోట్లతో పోలిస్తే ఇది 36 శాతం అధికం. కేటాయింపులు తగ్గడం ఇందుకు దోహదపడింది. ఇదే సమయంలో మొత్తం ఆదాయం రూ.2,625 కోట్ల నుంచి 7.7 శాతం వృద్ధితో రూ.2,837 కోట్లకు చేరింది. నికర వడ్డీ ఆదాయం రూ.2,071.7 కోట్ల నుంచి 2.6 శాతం పెరిగి రూ.2,124.7 కోట్లకు చేరింది. నికర వడ్డీ మార్జిన్‌ 8.3 శాతం నుంచి 7.8 శాతానికి పరిమితమైంది. వడ్డీయేతర ఆదాయం 26.7 శాతం అధికమై రూ.712.3 కోట్లుగా నమోదైంది. స్థూల నిరర్థక ఆస్తులు (ఎన్‌పీఏలు) 1.1 శాతం నుంచి 10.81 శాతానికి, నికర ఎన్‌పీఏలు 0.26 శాతం నుంచి 3.01 శాతానికి చేరాయి. మొండి బకాయిలకు కేటాయింపులు రూ.1077.83 కోట్ల నుంచి రూ.805.71 కోట్లకు తగ్గాయి.
నీ ప్రస్తుత ఆర్థిక సంవత్సరం సెప్టెంబరు త్రైమాసికంలో బ్యాంక్‌ రూ.3009 కోట్ల నష్టాన్ని చవిచూసింది.