31న దిల్లీ హైకోర్టులో హాజరవ్వండి

డీఎంఆర్‌సీ, డీఏఎంఈపీఎల్‌కు సుప్రీంకోర్టు ఆదేశం

దిల్లీ: దిల్లీ మెట్రో రైల్‌ కార్పొరేషన్‌ (డీఎంఆర్‌సీ), రిలయన్స్‌ ఇన్‌ఫ్రాస్ట్రక్చర్‌కు చెందిన దిల్లీ ఎయిర్‌పోర్ట్‌ మెట్రో ఎక్స్‌ప్రెస్‌ ప్రైవేట్‌ లిమిటెడ్‌ (డీఏఎంఈపీఎల్‌)ను జనవరి 31న దిల్లీ హైకోర్టు ఎదుట హాజరుకావాలని సుప్రీంకోర్టు ఆదేశాలిచ్చింది. డీఏఎంఈపీఎల్‌కు రూ.4,600 కోట్ల చెల్లింపు ఆదేశాలకు సంబంధించిన కేసును సాధ్యమైనంత త్వరగా విచారించాల్సిందిగా దిల్లీ హైకోర్టును సుప్రీంకోర్టు కోరింది. ఈ కేసు విచారణ ఇంకా ఆలస్యమైతే ఇరు పక్షాలకూ మంచిది కాదని న్యాయమూర్తులు జస్టిస్‌ ఎల్‌.నాగేశ్వరరావు, జస్టిస్‌ బి.ఆర్‌.గవైలతో కూడిన ధర్మాసనం పేర్కొంది. డీఏఎంఈపీఎల్‌కు డీఎంఆర్‌సీ రూ.4,600 కోట్లు చెల్లించాలంటూ 2017లో ఇచ్చిన ఆదేశాలను 2021 సెప్టెంబరు 9న సుప్రీంకోర్టు సమర్థించిన సంగతి తెలిసిందే.