భువనగిరిలో ఏజీఐ గ్లాస్‌ప్యాక్‌

‘స్పెషాలిటీ గ్లాస్‌’ యూనిట్‌ ప్రారంభం

ఈనాడు, హైదరాబాద్‌: కంటెయినర్‌ గ్లాస్‌ బాటిల్‌ ఉత్పత్తి చేసే సంస్థ ఏజీఐ గ్లాస్‌ప్యాక్‌, హైదరాబాద్‌ సమీపంలోని భువనగిరిలో స్పెషాలిటీ గ్లాస్‌ కోసం కొత్త యూనిట్‌ను ప్రారంభించింది. రోజుకు 154 టన్నుల (టీపీడీ) ఉత్పత్తి సామర్థ్యంతో ఏర్పాటు చేసిన ఈ యూనిట్లో కాస్మొటిక్స్‌, ఫార్మాస్యూటికల్‌, ప్రీమియం స్పిరిట్స్‌ పరిశ్రమలకు అవసరమైన నెయిల్‌ పాలిష్‌ సీసాలు, వయల్స్‌, వైన్‌ సీసాలు, క్యాండిల్‌ జార్లు ఉత్పత్తి చేస్తారు.

350 ఉద్యోగాలు: దాదాపు 350 మందికి ఈ కొత్త యూనిట్లో ఉద్యోగాలు లభిస్తాయి. ఇక్కడ ఏటా రూ.250 కోట్ల ఆదాయాన్ని నమోదు చేసే అవకాశం ఉన్నట్లు ఏజీఐ గ్లాస్‌ప్యాక్‌ సీఈఓ రాజేష్‌ ఖోస్లా అన్నారు. స్పెషాలిటీ గ్లాస్‌ ఉత్పత్తుల విభాగంలో 10- 15 శాతం మార్కెట్‌ వాటా సంపాదించడం తమ లక్ష్యమని ఆయన వివరించారు. అత్యంత అధునాతన యంత్ర సామగ్రిని ఈ యూనిట్లో నెలకొల్పినట్లు తెలిపారు. సమీప భవిష్యత్తులో ఈ యూనిట్లో ఉత్పత్తి సామర్థ్యాన్ని ఇంకా పెంచుతామని అన్నారు. ఏజీఐ గ్లాస్‌ప్యాక్‌ పలు రకాల గ్లాస్‌ ఉత్పత్తులను ఉత్తర అమెరికా, ఐరోపా, ఆఫ్రికా, ఆసియా పసిఫిక్‌ దేశాలకు ఎగుమతి చేస్తోంది. ఈ సంస్థకు హైదరాబాద్‌, భువనగిరిలలో యూనిట్లు ఉన్నాయి. ఈ యూనిట్లలో రోజుకు 1600 టన్నుల గ్లాస్‌ను కరిగించి, పలు రకాల గ్లాస్‌ ఉత్పత్తులు సిద్ధం చేస్తోంది.