యాక్సిస్‌ బ్యాంక్‌ లాభం మూడు రెట్లు

దిల్లీ: అక్టోబరు- డిసెంబరు త్రైమాసికంలో యాక్సిస్‌ బ్యాంక్‌ ఏకీకృత నికర లాభం సుమారు 3 రెట్లు పెరిగి రూ.3,973 కోట్లకు చేరింది. రుణాల మంజూరులో బలమైన వృద్ధి, ఆస్తుల నాణ్యత మెరుగవ్వడం, కేటాయింపులు గణనీయంగా తగ్గడం ఇందుకు దోహదం చేసింది. స్టాండలోన్‌ పద్ధతలోనూ నికర లాభం రూ.1,116 కోట్ల నుంచి పెరిగి రూ.3,614.24 కోట్లకు చేరింది. మొత్తం ఆదాయం కూడా రూ.18,355 కోట్ల నుంచి రూ.21,101 కోట్లకు పెరిగింది. నికర వడ్డీ ఆదాయం 17 శాతం వృద్ధితో రూ.8,653 కోట్లకు చేరింది. వడ్డీయేతర ఆదాయం 15 శాతం పెరిగి రూ.3,344 కోట్లుగా నమోదైంది. మొత్తం కేటాయింపులు రూ.3,750.20 కోట్ల నుంచి తగ్గి రూ.1,334.83 కోట్లకు పరిమితమయ్యాయి. స్థూల నిరర్థక ఆస్తులు 3.53 శాతం నుంచి 3.17 శాతానికి తగ్గాయి.