ఈ వారంలోనే టాటాలకు ఎయిరిండియా అప్పగింత!

దిల్లీ: ఎయిరిండియాను ఈ వారం చివరికల్లా టాటా గ్రూపునకు అప్పగించే అవకాశం ఉందని ప్రభుత్వ ఉన్నతాధికారులు సోమవారం వెల్లడించారు. వేలం ప్రక్రియ ద్వారా ఎయిరిండియాను టాటా గ్రూపు అనుబంధ సంస్థ ట్యాలెస్‌ ప్రైవేట్‌ లిమిటెడ్‌ గతేడాది అక్టోబరు 8న రూ.18,000 కోట్లకు కొనుగోలు చేసిన సంగతి విదితమే. ఎయిరిండియాలో 100 శాతం వాటా విక్రయానికి అంగీకారం తెలుపుతూ, లెటర్‌ ఆఫ్‌ ఇంటెంట్‌ను టాటా గ్రూపునకు అక్టోబరు 11న ప్రభుత్వం జారీ చేసింది. అక్టోబరు 25న ఈ లావాదేవీకి సంబంధించి షేర్ల విక్రయ ఒప్పందంపై కేంద్రం సంతకాలు చేసింది. ఈ ఒప్పందానికి సంబంధించి మిగత ప్రక్రియ రాబోయే కొన్ని రోజుల్లో పూర్తయ్యే అవకాశం ఉందని అధికారులు తాజాగా తెలిపారు. ఈ వారం చివరికల్లా ఎయిరిండియాను టాటా గ్రూపునకు అప్పగించే అవకాశం ఉందని పేర్కొన్నారు. ఒప్పందంలో భాగంగా ఎయిరిండియా ఎక్స్‌ప్రెస్‌ను కూడా టాటా గ్రూపునకు అప్పగించాల్సి ఉంటుంది. ఎయిరిండియా ఎస్‌ఏటీఎస్‌లోనూ 50 శాతం వాటా టాటాల చేతిలోకి వెళ్తుంది.