ఆకాశ ఎయిర్‌ కార్యకలాపాలు జూన్‌ లోగా

దిల్లీ: మే చివర్లో లేదా జూన్‌ ప్రారంభంలో కార్యకలాపాలు ప్రారంభించడానికి రాకేశ్‌ ఝున్‌ఝున్‌వాలా నేతృత్వంలోని కొత్త విమానయాన సంస్థ ఆకాశ ఎయిర్‌ సన్నాహాలు చేస్తోంది. తాము ఆర్డరు చేసిన బోయింగ్‌ 737 మ్యాక్స్‌ విమానాల్లో మొదటిది ఏప్రిల్‌లో చేరొచ్చని సంస్థ భావిస్తోంది.  దేశీయ విమానయాన రంగ దీర్ఘకాల వృద్ధిపై బుల్లిష్‌గా ఉన్న సంస్థ 2023 మార్చికి విమానాల సంఖ్యను 18కి పెంచుకోవాలని లక్ష్యంగా పెట్టుకుంది. విమానయాన సంస్థలపై కొవిడ్‌ ప్రతికూలతలు కొనసాగుతున్నప్పటికీ.. దీర్ఘకాలంలో భారత వాణిజ్య విమానయానం ఆకర్షణీయంగా కనిపిస్తోందని ఆకాశ ఎయిర్‌ సీఈఓ వినయ్‌ దూబే పేర్కొన్నారు. ప్రస్తుత ఇబ్బందులన్నీ తాత్కాలికమని, భవిష్యత్‌లో మంచి రోజులు వస్తాయని ఆశాభావం వ్యక్తం చేశారు.