2021-22లో భారత వృద్ధి 9 శాతమే: ఐఎంఎఫ్‌

వాషింగ్టన్‌: ప్రస్తుత ఆర్థిక సంవత్సరానికి భారత ఆర్థిక వృద్ధి రేటు అంచనాలను 9 శాతానికి పరిమితం చేస్తున్నట్లు అంతర్జాతీయ ద్రవ్య నిధి (ఐఎంఎఫ్‌) మంగళవారం ప్రకటించింది. కొవిడ్‌ ఒమిక్రాన్‌ కేసుల విస్తృతి వల్ల వ్యాపార కార్యకలాపాలు, ప్రజల కదలికలపై ప్రభావం పడిందని సంస్థ పేర్కొంది. జీడీపీ వృద్ధి 9.5 శాతంగా ఉంటుందని గత ఏడాది అక్టోబరులో అంచనా వేసిన ఐఎంఎఫ్‌ తాజాగా 0.5 శాతం కోత విధించింది. వచ్చే ఆర్థిక సంవత్సరానికి (2022-23) దేశ వృద్ధి రేటు అంచనాను 0.5 శాతం పెంచి 7.1 శాతంగా నమోదు కావొచ్చని పేర్కొంది. 2020-21లో భారత ఆర్థిక వ్యవస్థ 7.3 శాతం క్షీణించిన సంగతి తెలిసిందే.

* ప్రపంచ ఆర్థిక వ్యవస్థ వృద్ధిపైనా ఈ ఏడాది ఒమిక్రాన్‌ ప్రభావం అధికంగా కనిపిస్తుందని ఐఎంఎఫ్‌ తెలిపింది. 2022లో 4.4% మేర అంతర్జాతీయ వృద్ధి నమోదు కావొచ్చని అంచనా చేసింది. గత ఏడాది అక్టోబరు అంచనా వేసిన 4.9 శాతం కంటే ఇది 0.5 శాతం తక్కువ.