బీమాకు ప్రత్యేక సెక్షన్‌ ఇవ్వాలి

జీఎస్‌టీ తగ్గించాలి

ఆర్థిక మంత్రికి వినతులు

బడ్జెట్‌-2022

ఈనాడు, హైదరాబాద్‌: కొవిడ్‌ -19 తర్వాత బీమాకు ప్రాధాన్యం ఒక్కసారిగా పెరిగింది. కొత్తగా బీమా తీసుకుంటున్న వారి సంఖ్య, గత కొన్నేళ్లతో పోలిస్తే దాదాపు 40% అధికమైంది. ప్రజల ఆర్థిక ప్రణాళికల్లో బీమా ఇప్పుడు కీలకంగా మారింది. ఈ నేపథ్యంలో విత్తమంత్రి ఈ బడ్జెట్‌లో బీమారంగంపై ప్రత్యేక దృష్టి సారించాలని పరిశ్రమవర్గాలు కోరుతున్నాయి.

రూ.లక్షవరకైనా..: సెక్షన్‌ 80సీ కింద మినహాయింపు పరిమితైన రూ.1.5 లక్షల్లోనే ఈపీఎఫ్‌, వీపీఎఫ్‌, ఇంటి రుణం అసలు, పిల్లల ట్యూషన్‌ ఫీజులు, ఎన్‌ఎస్‌సీ ఇతర పెట్టుబడులు, జీవిత బీమా ప్రీమియం కలిసి ఉంటాయి. ఈపీఎఫ్‌, ఇంటిరుణం అసలుతోనే చాలామందికి ఈ సెక్షన్‌ పూర్తవుతోంది. అందువల్ల దీర్ఘకాలం కొనసాగే జీవిత బీమా కోసం ప్రత్యేకంగా ఒక సెక్షన్‌ ఏర్పాటు చేసి, గరిష్ఠ పరిమితి రూ.లక్ష మేరకైనా ఇవ్వాలని కోరుతున్నాయి.టర్మ్‌ పాలసీ ప్రీమియానికి ప్రత్యేక మినహాయింపు కల్పించాలంటున్నారు.

సరిపోవడం లేదు:  ఆరోగ్య బీమా కోసం సెక్షన్‌ 80డీ ప్రకారం 60 ఏళ్లలోపు వారికి రూ.25వేలు, 60 ఏళ్లు దాటిన వారికి రూ.50వేలు మినహాయింపు లభిస్తుంది. కనీసం రూ.5 లక్షల పాలసీ తీసుకుంటే మినహా ఫలితం ఉండటం లేదు. ఈ నేపథ్యంలో ఆరోగ్య బీమా ప్రీమియం పరిమితిని 60 ఏళ్లలోపు వారికి రూ.50వేల వరకు పెంచాలని; వైద్య పరీక్షల కోసం ఇస్తున్న మినహాయింపును రూ.5వేల  రూ.10వేలకు పెంచాలనే విన్నపాలున్నాయి.

జీఎస్‌టీ భారం: బీమా ప్రీమియంపై జీఎస్‌టీ 18% ఉంటోంది. అంటే రూ.1,000 ప్రీమియానికి రూ.180 జీఎస్‌టీ చెల్లించాలి. ఆరోగ్య బీమా ఇప్పుడు తప్పనిసరి అవసరంగా మారినందున, పాలసీ ప్రీమియంపై 5శాతానికి మించి జీఎస్‌టీ ఉండకూడదని కోరుతున్నారు.