అరబిందో ఫార్మా యూనిట్‌-1కు యూఎస్‌ఎఫ్‌డీఏ ‘హెచ్చరిక లేఖ’

ఈనాడు, హైదరాబాద్‌: అరబిందో ఫార్మాకు హైదరాబాద్‌ సమీపంలో ఉన్న యూనిట్‌-1 కు  అమెరికా ఔషధ నియంత్రణ సంస్థ (యూఎస్‌ఎఫ్‌డీఏ) ‘హెచ్చరిక లేఖ’ జారీ చేసింది. ఏపీఐ ఔషధాలు ఉత్పత్తి చేసే ఈ యూనిట్‌ లో గత ఏడాది ఆగస్టు 2 - 12 తేదీల్లో యూఎస్‌ఎఫ్‌డీఏ ప్రతినిధి బృందం తనిఖీలు చేసింది. జీఎంపీ (గుడ్‌ మానుఫ్యాక్చరింగ్‌ ప్రాక్టీసెస్‌) ప్రమాణాలను పాటించనందున మందుల నాణ్యతా ప్రమాణాలపై ప్రభావం పడుతోందని గుర్తించడంతో ఈ ‘హెచ్చరిక లేఖ’ జారీ చేసింది. ‘తరుచుగా ఇటువంటి పొరపాట్లు  జరుగుతున్నాయంటే, మందుల ఉత్పత్తి కార్యకలాపాలపై తగినంత యాజమాన్య పర్యవేక్షణ లేదని అనిపిస్తోంది’ అని యూఎస్‌ఎఫ్‌డీఏ పేర్కొంది. ఈ లోపాలను సాధ్యమైనంత త్వరగా సరిదిద్దుకోవాలని, లేనిపక్షంలో ఈ యూనిట్లో ఉత్పత్తి అయ్యే మందులను యూఎస్‌ మార్కెట్లోకి అనుమతించడం కుదరదని స్పష్టం చేసింది. ఈ ‘హెచ్చరిక లేఖ’ ఈ నెల 12న జారీ అయింది. దీనికి సమాధానం ఇవ్వటానికి కంపెనీకి యూఎస్‌ఎఫ్‌డీఏ రెండు వారాల గడువు ఇచ్చింది.