యాడ్‌ఆన్‌మోలో జొమాటో పెట్టుబడులు

ఈనాడు, హైదరాబాద్‌: డిజిటల్‌ ప్రకటనల హైదరాబాదీ అంకుర సంస్థ ‘యాడ్‌ఆన్‌మో’లో జొమాటో పెట్టుబడులు పెట్టింది. దాదాపు 19.48శాతం వాటా కోసం రూ.112.20 కోట్లు సమకూర్చింది. టి-హబ్‌ నుంచి వచ్చిన ఈ సంస్థను సందీప్‌ బొమ్మిరెడ్డి, శ్రవంత్‌ గాజుల సహ వ్యవస్థాపకులుగా ప్రారంభించారు. యాడ్‌ఆన్‌మో ప్రధానంగా కార్లపై డిజిటల్‌ యాడ్లను ప్రదర్శించే యాడ్‌-టెక్‌ అంకురం. ఆహార ఆర్డర్లు పెరిగేందుకు మరిన్ని డిజిటల్‌ మార్గాలు అందుబాటులోకి వస్తాయనే లక్ష్యంతో ఈ సంస్థలో పెట్టుబడులు పెట్టినట్లు జొమాటో తెలిపింది.  ప్రస్తుతం 200 మంది ఉద్యోగులున్నారని, వీరి సంఖ్య త్వరలోనే 800కు చేరుతుందని సందీప్‌ తెలిపారు. యాడ్‌ఆన్‌మోకి పెట్టుబడులు రావడంపై కేటీఆర్‌ ట్విటర్‌లో స్పందిస్తూ.. హైదరాబాద్‌ అంకుర వ్యవస్థకు ఇది మేలు చేసే అంశమని ప్రశంసించారు.