కాల్స్‌, మెస్సేజ్‌ల వివరాలు

రెండేళ్లపాటు దాచాల్సిందే

సర్క్యులర్‌ జారీ చేసిన డాట్‌

దిల్లీ: సాధారణ నెట్‌వర్క్‌లతో పాటు ఇంటర్నెట్‌పై చేసిన అంతర్జాతీయ కాల్స్‌, శాటిలైట్‌ ఫోన్‌ కాల్స్‌, కాన్ఫరెన్స్‌ కాల్స్‌, మెస్సేజ్‌లను కనీసం రెండేళ్ల పాటు దాచి ఉంచాలని ప్రభుత్వం నిర్ణయించింది. ఈ మేరకు టెలికాం విభాగం (డాట్‌) సర్క్యులర్‌ను జారీ చేసింది. గతంలో ఈ వివరాలను ఏడాది పాటు నిల్వ చేస్తే సరిపోయేది. గత డిసెంబరులో యూనిఫైడ్‌ లైసెన్స్‌కు (యూఎల్‌) డాట్‌ సవరణ చేసిన తర్వాత కాల్‌ డేటా, ఇంటర్నెట్‌ లాగ్స్‌ రికార్డులను కనీసం రెండేళ్ల పాటు నిల్వ చేయాలని సూచించింది. దీంతో యూఎల్‌ హోల్డర్లు అయిన టెలికాం కంపెనీలు భారతీ ఎయిర్‌టెల్‌, రిలయన్స్‌ జియో, వొడాఫోన్‌ ఐడియా, బీఎస్‌ఎన్‌ఎల్‌లు ఈ సవరణకు లోబడి వివరాలు నిల్వ చేయాల్సి ఉంటుంది. అలాగే టాటా కమ్యూనికేషన్స్‌, సిస్కో వెబెక్స్‌, ఏటీఅండ్‌టీ గ్లోబల్‌ నెట్‌వర్క్‌లకు కూడా ఈ సవరణ వర్తిస్తుంది.