LIC IPO: మే తొలి వారంలో ఎల్‌ఐసీ పబ్లిక్‌ ఇష్యూ!

విక్రయానికి 3.5% వాటా!

దిల్లీ: ఎల్‌ఐసీ పబ్లిక్‌ ఇష్యూ పరిమాణాన్ని 3.5 శాతానికి ప్రభుత్వం తగ్గించవచ్చని తెలుస్తోంది. అంటే రూ.21,000 కోట్ల వరకు సమీకరించేందుకు వచ్చే నెల మొదటి వారంలో ఇష్యూకు వచ్చే అవకాశం ఉందని ఒక అధికారి పేర్కొన్నారు. 5 శాతం వాటాను విక్రయించాలని ప్రభుత్వం ఫిబ్రవరిలో ప్రణాళికలు రచించిన విషయం తెలిసిందే. అయితే రష్యా-ఉక్రెయిన్‌ యుద్ధం వల్ల మార్కెట్‌ ఊగిసలాటలకు గురి కావడంతో ఇష్యూ పరిమాణాన్ని తగ్గించాలని ప్రభుత్వం భావించినట్లు సమాచారం. బుధవారం కల్లా సెబీకి ఎల్‌ఐసీ ముసాయిదా పత్రాలను దాఖలు చేయొచ్చని ఆ అధికారి తెలిపారు. ప్రభుత్వానికి 100 శాతం వాటా ఉన్న ఎల్‌ఐసీ విలువను రూ.6 లక్షల కోట్లుగా లెక్కగట్టిన సంగతి తెలిసిందే.