58 శాతం పెరిగిన ఐఓబీ లాభం

దిల్లీ: మార్చి త్రైమాసికంలో ఇండియన్‌ ఓవర్‌సీస్‌ బ్యాంక్‌ (ఐఓబీ) రూ.552 కోట్ల నికరలాభాన్ని నమోదు చేసింది. 2020-21 ఇదే త్రైమాసిక లాభం రూ.350 కోట్లతో పోలిస్తే ఇది 58 శాతం అధికం. నిరర్థక ఆస్తులకు కేటాయింపులు రూ.1380 కోట్ల నుంచి రూ.1014 కోట్లకు తగ్గడమే ఇందుకు కారణం. మొత్తం ఆదాయం మాత్రం రూ.6074 కోట్ల నుంచి రూ.5719 కోట్లకు పరిమితమైంది. నికర వడ్డీ ఆదాయం 4 శాతం పెరిగి రూ.4215 కోట్లకు చేరింది. స్థూల నిరర్థక ఆస్తులు (ఎన్‌పీఏ) 11.69 శాతం నుంచి 9.82 శాతానికి, నికర ఎన్‌పీఏలు 3.58 శాతం నుంచి 2.65 శాతానికి తగ్గాయి.