ఎన్‌టీపీసీ లాభంలో 12 శాతం వృద్ధి

దిల్లీ: ప్రభుత్వ రంగ విద్యుదుత్పత్తి సంస్థ ఎన్‌టీపీసీ మార్చి త్రైమాసికానికి ఏకీకృత పద్ధతిలో రూ.5,199.51 కోట్ల నికర లాభాన్ని ఆర్జించింది. 2020-21 ఇదే త్రైమాసిక లాభం రూ.4,649.49 కోట్లతో పోలిస్తే ఇది 12 శాతం అధికం. ఇదే సమయంలో మొత్తం ఆదాయం రూ.31,687.24 కోట్ల నుంచి రూ.37,724.42 కోట్లకు పెరిగింది. గత ఆర్థిక సంవత్సరం మొత్తంమీద (2021-22) రూ.1,34,994.31 కోట్ల ఆదాయంపై  రూ.16,960.29 కోట్ల లాభాన్ని ఆర్జించింది. 2020-21లో ఆదాయం రూ.1,15,546.83 కోట్లు కాగా, లాభం రూ.14,969.40 కోట్లు మాత్రమే. 2021-22 ఆర్థిక సంవత్సరానికి ఒక్కో షేరుకు రూ.3 తుది డివిడెండును కంపెనీ ప్రకటించింది. 2022 ఫిబ్రవరిలో చెల్లించిన రూ.4 మధ్యంతర డివిడెండుకు ఇది అదనం.