విమానాల్లో సీట్లు సరిగా లేకపోవడంపై డీజీసీఏ ఆగ్రహం

దిల్లీ: దేశీయ, అంతర్జాతీయ విమానాల్లో అనువుగా లేని (అన్‌సర్వీసబుల్‌) సీట్లను సైతం ప్రయాణికులకు కేటాయిస్తున్నాయంటూ, విమానయాన సంస్థలపై పౌర విమానయాన డైరెక్టర్‌ జనరల్‌ (డీజీసీఏ) మంగళవారం ఆగ్రహం వ్యక్తం చేసింది. విమానాల్లోని సీట్లు, ఇతర క్యాబిన్‌ ఫిట్టింగ్‌ల ఆడిట్‌ను ఈ ఏడాది ప్రారంభంలో డీజీసీఏ నిర్వహించింది. కొన్ని సీట్లు విరిగి, ప్రయాణించేందుకు అనువుగా లేవని గుర్తించింది. అయినా ఆయా సంస్థలు తమ దేశీయ, అంతర్జాతీయ విమాన సర్వీసుల్లో ఆ సీట్లనూ ప్రయాణికులకు కేటాయిస్తున్నాయని తమ దృష్టికి వచ్చిందని డీజీసీఏ పేర్కొంది. ఇందువల్ల ప్రయాణికులకు అసౌకర్యం కలగడమే కాకుండా ప్రయాణ భద్రతకూ ముప్పు కలిగిస్తుందని డీజీసీఏ ఆగ్రహం వ్యక్తం చేసింది. ఇకపై మంచి సీట్లను మాత్రమే ప్రయాణికులకు కేటాయించాలని, ఒకవేళ ఏ సంస్థ అయినా దీన్ని అతిక్రమిస్తే తీవ్ర చర్యలుంటాయని హెచ్చరించింది.