Chitra Ramkrishna: చిత్రా రామకృష్ణకు రూ.3.12 కోట్ల నోటీస్‌

లేదంటే అరెస్టు; ఆస్తులు, ఖాతాల అటాచ్‌మెంట్‌: సెబీ  

దిల్లీ: స్టాక్‌ ఎక్స్ఛేంజీలో పాలనా పరమైన అవకతవకలకు సంబంధించిన కేసులో రూ.3.12 కోట్లు  కట్టాలంటూ ఎన్‌ఎస్‌ఈ మాజీ చీఫ్‌ ఎగ్జిక్యూటివ్‌ చిత్రా రామకృష్ణకు మార్కెట్‌ నియంత్రణాధికార సంస్థ సెబీ నోటీసు పంపింది. 15 రోజుల్లోగా చెల్లింపులు జరపడంలో విఫలమైతే అరెస్టుకు ఆదేశాలివ్వడంతో పాటు; ఆస్తుల, బ్యాంకు ఖాతాల అటాచ్‌మెంట్‌ జరుగుతుందని హెచ్చరించింది. ఎన్‌ఎస్‌ఈకి చిత్ర కంటే ముందు అధిపతిగా వ్యవహరించిన రవి నరేన్‌, సుబ్రమణియన్‌, ఇతరులపైనా అపరాధ రుసుమును సెబీ గతంలో విధించింది. ప్రస్తుతం చిత్రా రామకృష్ణ దిల్లీలోని తీహార్‌ జైలులో ఉన్నారు. ఎన్‌ఎస్‌ఈ కో-లొకేషన్‌ కుంభకోణం కేసులో; ఎక్స్ఛేంజీలో పాలనాపరమైన అవకతవకలపై దర్యాప్తునకు సంబంధించి మార్చి 6న సీబీఐ ఆమెను అరెస్టు చేసింది.

రామకృష్ణ స్టేట్‌మెంట్‌ తీసుకున్న ఈడీ: ఇటీవల చిత్రా రామకృష్ణ స్టేట్‌మెంట్‌ను ఎన్‌ఫోర్స్‌మెంట్‌ డైరెక్టరేట్‌(ఈడీ) రికార్డు చేసింది. చిత్ర, ఇతరులపై మనీ లాండరింగ్‌ కేసు దర్యాప్తులో భాగంగా ఈ చర్యలు చేపట్టినట్లు అధికారులు మంగళవారం తెలిపారు. ‘రెండు సందర్భాల్లో ఆమె స్టేట్‌మెంట్‌ రికార్డు చేశాం. నగదు అక్రమ బదిలీ నిరోధ చట్టం(పీఎమ్‌ఎల్‌ఏ)లోని క్రిమినల్‌ సెక్షన్ల కింద ఇది జరిగింద’ని వారు వివరించారు.