రీపోస్‌లో రతన్‌ టాటా పెట్టుబడి

ముంబయి: పరిశ్రమలకు అవసరమైన డీజిల్‌, సీఎన్‌జీ, ఎల్‌ఎన్‌జీ, విద్యుత్‌ వాహన ఛార్జింగ్‌లను, వినియోగదారుల వద్దకే వెళ్లి అందించే అంకుర సంస్థ రీపోస్‌ ఎనర్జీలో టాటా సన్స్‌ గౌరవ ఛైర్మన్‌ రతన్‌ టాటా పెట్టుబడులు పెట్టారు. సిరీస్‌ ఎ ఫండింగ్‌లో భాగంగా రూ.56 కోట్లను ఆయన సమకూర్చారు. రతన్‌ టాటాతో పాటు మరికొంతమంది పెట్టుబడి సమకూర్చినట్లు సంస్థ పేర్కొంది. టాటా ఇప్పటికే ఈ సంస్థలో పెట్టుబడులు పెట్టగా, మరోసారి ఈ మొత్తాన్ని సమకూర్చారు. కొత్తగా వచ్చిన నిధులను సంస్థ విస్తరణ, ఇతర అవసరాల కోసం వినియోగించనున్నట్లు ఈ సంస్థ వ్యవస్థాపకులు చేతన్‌ వాలున్జ్‌, అదితి భోస్లే వాలున్జ్‌ తెలిపారు. ప్రస్తుతం ఈ సంస్థ 220 పట్టణాల్లో 1,500 మంది భాగస్వాములను కలిగి ఉంది. 2,500 రీపోస్‌ మొబైల్‌ ఫ్యూయల్‌ పంపులను నిర్వహిస్తోంది. డీజిల్‌ డెలివరీ కోసం మహీంద్రా ఫూరియో ట్రక్కులను వినియోగించేందుకు రీపోస్‌, మహీంద్రా అండ్‌ మహీంద్రాల మధ్య ఒప్పందం కుదిరింది.