భారత సార్వభౌమ రేటింగ్‌ ‘స్థిరం’

ప్రతికూలం నుంచి మెరుగు పరచిన ఫిచ్‌

2022-23లో వృద్ధి 7.8 శాతం

దిల్లీ: దాదాపు రెండేళ్ల తర్వాత భారత సార్వభౌమ రేటింగ్‌ భవిష్యత్తు అంచనాలను ఫిచ్‌ రేటింగ్స్‌ పెంచింది. ‘ప్రతికూలం’ రేటింగ్‌ను ‘స్థిరం’గా మార్చింది. మధ్యకాల వ్యవధిలో వృద్ధికి ఆటంకాలు తగ్గుతున్నందున,  భారత ఆర్థిక రికవరీ వేగం పుంజుకోవచ్చని అభిప్రాయపడింది. అయితే రేటింగ్‌ను ‘బీబీబీ-’ వద్ద యథాతథంగా ఉంచింది. అంతర్జాతీయ కమొడిటీ ధరల పెరుగుదల రూపంలో స్వల్పకాల ప్రతికూలతలు ఉన్నప్పటికీ.. ఆర్థిక రంగ బలహీనతలు తగ్గడం కలిసిరావొచ్చని పేర్కొంది. ప్రస్తుత ఆర్థిక సంవత్సరం (2022-23)లో వృద్ధి అంచనాలను 8.5 శాతం నుంచి 7.8 శాతానికి కోత విధించింది. ద్రవ్యోల్బణ ఒత్తిడి ఇందుకు కారణమని తెలిపింది. కొవిడ్‌-19 పరిణామాల ప్రభావం నుంచి భారత ఆర్థిక వ్యవస్థ బలంగా పుంజుకోవడం కొనసాగుతుందని అంచనా వేసింది. 2021-22లో జీడీపీ వృద్ధి 8.7 శాతం కాగా.. ప్రస్తుత ఆర్థిక సంవత్సరంలో 7.2 శాతంగా నమోదు కావచ్చని రిజర్వ్‌ బ్యాంక్‌ ఆఫ్‌ ఇండియా అంచనా వేయడం గమనార్హం. ఫిచ్‌ నివేదిక ప్రకారం..

* ప్రభుత్వం ఇంధనంపై ఎక్సైజ్‌ కోత విధించడంతో ఈ ఆర్థిక సంవత్సరంలో ద్రవ్యలోటు జీడీపీలో 6.8 శాతానికి చేరే అవకాశం ఉందని ఫిచ్‌ పేర్కొంది. బడ్జెట్‌లో లక్ష్యాన్ని 6.4 శాతంగా విధించుకున్నారు.

* మధ్యకాల వ్యవధిలో భారత వృద్ధి అవకాశాలు బలంగా ఉన్నాయి. ఇతర దేశాలతో పోలిస్తే భారత్‌ బలమైన వృద్ధి రేటింగ్‌ మెరుగుదలకు కారణమైంది. 2024-25 నుంచి 2027-28 మధ్య భారత వృద్ధి దాదాపు 7 శాతంగా ఉండొచ్చు. ప్రభుత్వం మౌలిక సదుపాయాలపై దృష్టి పెడుతుండటం, సంస్కరణలు, ఆర్థిక రంగంలో ఒత్తిడిలు తగ్గడం ఇందుకు కలిసిరావొచ్చు.

* కరోనా పరిణామాల నేపథ్యంలో 2020 జూన్‌లో భారత రేటింగ్‌ అంచనాలను ‘స్థిరం’ నుంచి ‘ప్రతికూలాని’కి ఫిచ్‌ మార్చింది. 2006 ఆగస్టు నుంచి భారత రేటింగ్‌ ‘బీబీబీ-’గా కొనసాగుతోంది.