రష్యా నుంచి చమురు దిగుమతులు 50 రెట్లు పెరిగాయ్‌

దిల్లీ: రష్యా నుంచి భారత్‌కు చమురు దిగుమతులు, ఈ ఏడాది ఏప్రిల్‌ నుంచి 50 రెట్లు పెరిగాయని ప్రభుత్వ ఉన్నతాధికారి ఒకరు వెల్లడించారు. ప్రస్తుతం భారత్‌ దిగుమతి చేసుకుంటున్న మొత్తం చమురులో రష్యా వాటానే 10 శాతమని పేర్కొన్నారు. మన దేశానికి చమురు అధికంగా సరఫరా చేసే 10 దేశాల్లో రష్యా చేరిందని వివరించారు. ఉక్రెయిన్‌పై రష్యా యుద్ధానికి ముందు ఇది కేవలం 0.2 శాతంగా ఉండేదని వివరించారు. రష్యా నుంచి కొంటున్న చమురులో 40 శాతం వరకు  ప్రైవేట్‌ సంస్థలే (రిలయన్స్‌ ఇండస్ట్రీస్‌, రోస్‌నెఫ్ట్‌కు చెందిన నయారా ఎనర్జీ) తీసుకొస్తున్నాయి. మే నెలలో చూస్తే భారత్‌కు రెండో అతిపెద్ద చమురు సరఫరాదారుగా రష్యా అవతరించింది. అంతకుముందు ఈ స్థానంలో సౌదీ అరేబియా ఉండేది. మొదటి స్థానంలో ఇరాక్‌ కొనసాగుతోంది.