మహిళా బృందాలను పెంచనున్న మేక్‌మైట్రిప్‌

దిల్లీ: ‘సెలవుల నిపుణులు’తో కూడిన మహిళా బృందాల సంఖ్యను పెంచడానికి సన్నాహాలు చేస్తున్నట్లు ఆన్‌లైన్‌ పర్యాటక సంస్థ మేక్‌మైట్రిప్‌ వెల్లడించింది. గత ఆర్థిక సంవత్సరంలో ఈ బృందాలు అత్యధిక స్థాయిలో ప్యాకేజీలను విక్రయించడంతో పాటు, స్థిర వృద్ధి నమోదుచేశాయని తెలిపింది. 2021-22లో సెలవుల నిపుణులుగా సేవలందిస్తున్న మహిళా ఫ్రీలాన్సర్ల బృందాలు దాదాపు రెండు లక్షల మంది పర్యాటకులకు ప్యాకేజీల విషయంలో తోడ్పాటు అందించాయి. గత పదేళ్లలోనే అత్యధిక ప్యాకేజీలను ఈ బృందాలు విక్రయించాయి. ప్రస్తుతం మేక్‌మైట్రిప్‌కు 850 మందికి పైగా మహిళా సెలవుల నిపుణులు ఉన్నారు. ఇందులో 43 శాతం మంది తల్లులు, సంరక్షకులు ఉన్నారు. వీరంతా దిల్లీ, ముంబయి, బెంగళూరు, కోల్‌కతా, హైదరాబాద్‌, ఇండోర్‌, అహ్మదాబాద్‌, చండీగఢ్‌, లఖ్‌నవూ వంటి నగరాలకు చెందినవారు. మహిళా బృందాలను ఎంత సంఖ్యలో పెంచనున్నారో కంపెనీ వెల్లడించలేదు.