పల్సర్‌ 250లో ఆల్‌ బ్లాక్‌ వేరియంట్‌

ధర రూ.1.50 లక్షల నుంచి

ముంబయి: పల్సర్‌ 250 మోడల్‌లో ఆల్‌- బ్లాక్‌ వేరియంట్‌ను శుక్రవారం బజాజ్‌ ఆటో విడుదల చేసింది. డ్యుయల్‌ ఛానల్‌ ఏబీఎస్‌ (యాంటీ లాంక్‌ బ్రేకింగ్‌ సిస్టమ్‌)తో దీనిని అందుబాటులోకి తెచ్చింది. పల్సర్‌ ఎన్‌250 (న్యాక్డ్‌ స్ట్రీట్‌ ఫైటర్‌), పల్సర్‌ ఎఫ్‌ 250 (సెమీ ఫెయిర్డ్‌ స్ట్రీట్‌ రేసర్‌)లు రూ.1.50 లక్షల (ఎక్స్‌షోరూం, దిల్లీ) ధరలో లభ్యమవుతాయని కంపెనీ తెలిపింది. అయితే పల్సర్‌ 250 మోడల్‌లో సింగిల్‌ ఛానల్‌ ఏబీఎస్‌ వేరియంట్‌ బైకును ప్రస్తుత రంగుల్లోనే విక్రయించడాన్ని కొనసాగిస్తామని పేర్కొంది. ఈ బైక్‌ను విడుదల చేశాక 6 నెలల కంటే తక్కువ సమయంలోనే 10,000 బైకులను డెలివరీ చేశామని, బీఎస్‌-6 శకం ప్రారంభం అయ్యాక 250 సీసీ మోటార్‌సైకిల్‌ విభాగంలో ఇదో ఘనతగా కంపెనీ తెలిపింది. పల్సర్‌ 250 డ్యుయల్‌ ఛానల్‌ ఏబీఎస్‌ వేరియంట్‌ ముందు వైపు 300 ఎంఎం, వెనక వైపు 230 ఎంఎం డిస్క్‌ బ్రేకులు, వెడల్పైన టైరు డైమెన్షన్లను కలిగి ఉందని, స్లిప్‌ అవ్వకుండా ఇవి రక్షణ కలిపిస్తాయని బజాజ్‌ ఆటో వివరించింది.