టయోటా ప్లాంటులో సుజుకీ ఎస్‌యూవీల ఉత్పత్తి

ఆగస్టు నుంచి ప్రారంభం

దిల్లీ: జపాన్‌ వాహన దిగ్గజాలు టయోటా, సుజుకీలు తమ భాగస్వామ్యాన్ని మరింత బలోపేతం చేసుకోనున్నాయి. ఇందులో భాగంగా సుజుకీ అభివృద్ధి చేసిన కొత్త ఎస్‌యూవీ ఉత్పత్తిని టయోటా కిర్లోస్కర్‌ మోటార్‌(టీకేఎమ్‌)లో ఆగస్టు నుంచి తయారు చేస్తారు. భారత్‌లో ఈ కొత్త మోడల్‌ను సుజుకీ భారత విభాగమైన మారుతీ సుజుకీ ఇండియా, టీకేఎమ్‌లు సుజుకీ, టయోటా మోడళ్లుగా మార్కెట్‌ చేయనున్నాయి. ఆఫ్రికా వంటి మార్కెట్లకూ కొత్త మోడల్‌ను ఎగుమతి చేయనున్నారు. ‘భారత్‌లో దీర్ఘకాలం పాటు పనిచేస్తున్న సుజుకీతో కలిసి కొత్త ఎస్‌యూవీని ప్రకటించడానికి సంతోషిస్తున్నామ’ని టయోటా ప్రెసిడెంట్‌ అకియో టయోడా పేర్కొన్నారు. కర్బన ఉద్గారాలను తగ్గించడానికి తమ వంతు కృషి చేస్తామన్నారు. టయోటాతో భాగస్వామ్యాన్ని కొనసాగించడం ద్వారా కొత్త వ్యాపారావకాశాలను పరిశీలిస్తామని సుజుకీ ప్రెసిడెంట్‌ తొషిహిరో సుజుకీ అన్నారు.