మహీంద్రా కొత్త ఎస్‌యూవీ స్కార్పియో ఎన్‌

ప్రారంభ ధర రూ.11.99 లక్షలు

ముంబయి: మహీంద్రా అండ్‌ మహీంద్రా సరికొత్త ఎస్‌యూవీ స్కార్పియో-ఎన్‌ను విడుదల చేసింది. 5 వేరియంట్లలో లభించనున్న ఈ కారు ప్రారంభ ధర రూ.11.99 లక్షలు (ఎక్స్‌-షోరూమ్‌). జులై 30 నుంచి ఆన్‌లైన్‌తో పాటు మహీంద్రా విక్రయశాలల్లో స్కార్పియో-ఎన్‌ బుకింగ్‌లు ప్రారంభమవుతాయని, పండగల సీజన్‌లో డెలివరీ మొదలుపెడతామని కంపెనీ వెల్లడించింది. ఈ కారు అభివృద్ధికి కంపెనీ రూ.1600 కోట్ల పెట్టుబడులు పెట్టింది. పెట్రోల్‌, డీజిల్‌ ఇంజిన్‌లతో పాటు మాన్యువల్‌, ఆటోమేటిక్‌ ట్రాన్స్‌మిషన్‌ల్లో లభించనుంది. స్కార్పియో-ఎన్‌ను బిగ్‌డాడీగా మహీంద్రా వ్యవహరిస్తోంది. ఆరు ఎయిర్‌బ్యాగ్‌లు, డ్రైవర్‌ అలిసిపోతే గుర్తించే వ్యవస్థ, ఎల్‌ఈడీ ప్రొజెక్టర్‌ హెడ్‌ల్యాంప్స్‌ వంటి ఫీచర్లు ఇందులో ఉన్నాయి. టాటా సఫారీ, హ్యుందాయ్‌ క్రెటా, టయోటా ఫార్చునర్‌ వంటి మోడళ్లతో ఈ కారు పోటీపడనుంది.