వియత్నాం నుంచి హైదరాబాద్‌కు త్వరలో విమాన సర్వీసులు

ముంబయి: వియత్నాం విమానయాన సంస్థ వీట్‌జెట్‌ హైదరాబాద్‌తో పాటు మనదేశంలోని మరో 4 నగరాలకు విమాన సేవలు ప్రారంభించనుంది. వియత్నాంలోని సముద్ర తీర ప్రాంత నగరమైన డా నాంగ్‌ నుంచి భారతదేశంలోని హైదరాబాద్‌, దిల్లీ, ముంబయి, అహ్మదాబాద్‌, బెంగళూరు నగరాలకు  విమాన సర్వీసులు నిర్వహిస్తామని వీట్‌జెట్‌ వెల్లడించింది. ఈ సంవత్సరాంతానికి ఈ సేవలు ప్రారంభమవుతాయని, వారానికి 4-7 విమాన సర్వీసులు ఉంటాయని తెలియజేసింది. దీని వల్ల రెండు దేశాల మధ్య వ్యాపార కార్యకలాపాలు, పర్యాటకుల రాకపోకలు పెరుగుతాయని వివరించింది. డా నంగ్‌ నగరం అంతర్జాతీయంగా పెద్ద సంఖ్యలో పర్యాటకులను ఆకర్షిస్తోంది. వియత్నాం సాంస్కృతిక రాజధానిగా ఈ నగరానికి పేరుంది.