ఏసీలు, ఎల్‌ఈడీ లైట్ల పీఎల్‌ఐ పథకంలోకి మరో 15 కంపెనీలు

దిల్లీ: ఎయిర్‌ కండీషనర్లు (ఏసీ), ఎల్‌ఈడీ లైట్ల వంటి వైట్‌ గూడ్స్‌ రంగానికి ప్రకటించిన ఉత్పత్తి అనుసంధానిత ప్రోత్సాహక(పీఎల్‌ఐ) పథకం కింద లబ్ధి పొందేందుకు మరో 15 కంపెనీలు ఎంపికయ్యాయి. వీటిలో అదానీ కాపర్‌ ట్యూబ్స్‌, ఎల్‌జీ ఎలక్ట్రానిక్స్‌, విప్రో ఎంటర్‌ప్రైజెస్‌, జిందాల్‌ పాలీ ఫిల్మ్స్‌, సహారా సెమీకండక్టర్స్‌, క్రాంప్టన్‌ గ్రీవ్స్‌ కన్జూమర్‌ ఎలక్ట్రికల్స్‌, మిత్సుబిషి ఎలక్ట్రిక్‌ ఇండియా, జిందాల్‌ పాలీ ఫిల్మ్స్‌, సహస్ర సెమీ కండక్టర్స్‌ వంటి సంస్థలు తాజా జాబితాలో ఉన్నాయి. వీటి ద్వారా రూ.1,368 కోట్లపెట్టుబడులు రానున్నాయి. ఈ పథకం కింద 2021-22 నుంచి 2028-29 వరకు ప్రోత్సాహకాలు ఇచ్చేందుకు రూ.6,238 కోట్లు కేటాయించారు. గతేడాది దైకిన్‌, పానసోనిక్‌, సిస్కా, హావెల్స్‌ వంటి 46 కంపెనీలు ఈ పథకం తొలి దశ కింద ఎంపికయ్యాయి. అవి రూ.5,264 కోట్ల పెట్టుబడులు పెట్టనున్నాయి. తదుపరి ఈ పథకంపై పలు కంపెనీలు ఆసక్తి కనబరచినందున, వాణిజ్య, పరిశ్రమల మంత్రిత్వ శాఖ ఈ ఏడాది మార్చిలో మరోసారి దరఖాస్తులను ఆహ్వానించింది. రెండో దశలో 19 దరఖాస్తులు రాగా, అందులో 15కు ఆమోదం తెలిపినట్లు వాణిజ్య, పరిశ్రమల మంత్రిత్వ శాఖ వెల్లడించింది. రాబోయే అయిదేళ్లలో ఈ పథకం కింద రూ.1,22,671 కోట్ల విలువైన ఏసీ, ఎల్‌ఈడీ లైట్ల విడిభాగాల ఉత్పత్తి జరుగుతుందన్నది మంత్రిత్వ శాఖ అంచనా.